Cuntegn da la pagina

Consultaziun tar la lescha davart la gestiun da documents e l'archivaziun

  • Erste Mitteilung
  • Neuen Beitrag einfügen
La regenza ha deliberà per la consultaziun ina nova lescha davart la gestiun da documents e l'archivaziun. La basa legala duai satisfar a l'administraziun da datas actuala e digitala. Ils princips d'ina gestiun da documents e d'ina archivaziun moderna vegnan fixads en moda unitara per tut las autoritads en il chantun.

Las ordinaziuns vertentas davart ils archivs dateschan da l'onn 1988. Dapi quella giada ha l'elavuraziun electronica da datas survegnì ina impurtanza enorma. Tras quai èn resultads deposits che cuntegnan tant documents sin palpiri sco er documents electronics. La duplicitad difficultescha la gestiun da documents e l'archivaziun. Per transferir documents digitals en l'archiv dovri ina conversiun en formats archivabels.

La tendenza vers la digitalisaziun ha fatg novas pretensiuns er envers la protecziun da datas durant ils ultims decennis. Ina finamira essenziala è la protecziun da datas da persunas cunter ina invista nunautorisada. Las datas da las persunas vivas vegnan protegidas meglier sco fin ussa cun la nova lescha davart la gestiun da documents e l'archivaziun. A partir da cura che l'invista senza restricziuns en documents d'archiv duai esser pussaivla, vegn reglà en la lescha en moda differenziada. Ils temps da protecziun fixads en las ordinaziuns d'archivaziun vertentas èn per part memia curts. Quai ch'era accessibel a la publicitad gia en ils uffizis, resta dentant accessibel publicamain er en l'archiv. Ultra da quai sa referescha la lescha a las disposiziuns da la lescha da transparenza che la regenza è vidlonder d'elavurar.

La nova lescha davart la gestiun da documents e l'archivaziun vala per tut ils posts statals en il chantun: las autoritads, las cumissiuns, ils posts da servetsch, ils instituts, las corporaziuns, las vischnancas, las regiuns e.u.v. Resguardond la refurma dal territori ch'è en curs duai la lescha vegnir messa en vigur per il 1. da schaner 2016. Quellas regiuns che cumenzan da nov sin quest termin cun lur lavur survegnan cun la lescha ina basa stabila per lur activitads. La gronda part dals chantuns en Svizra dispona gia da leschas per manar las actas e per archivar. Il chantun Grischun ha pudì profitar da quai e po dar en consultaziun in sboz concis che regla tuttina ils puncts essenzials.

La consultaziun dura fin ils 3 da mars 2015. Ils documents en chaussa pon vegnir consultads en l'internet sut www.gr.ch / Consultaziuns currentas


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail martin.jaeger@ekud.gr.ch  
- Andrea Stadler, secretaria dal departament d'educaziun, cultura e protecziun da l'ambient, tel. 081 257 27 11, e-mail andrea.stadler@ekud.gr.ch  
- Reto Weiss, archivari dal stadi, uffizi da cultura, tel. 081 257 28 01, e-mail reto.weiss@sag.gr.ch  


Gremi: regenza
Funtauna: rg chanzlia chantunala dal Grischun
Neuer Artikel