Navigaziun principala

Cuntegn da la pagina

Recurs cunter las explicaziuns da votaziun: fixaziun da la via giudiziala en la lescha

  • Erste Mitteilung
  • Neuen Beitrag einfügen
La regenza suttametta al cussegl grond la missiva tar ina revisiun parziala da la lescha davart ils dretgs politics en il chantun Grischun. Sin il stgalim da la lescha duai vegnir fixada la pussaivladad da far recurs cunter las explicaziuns da votaziun.

En la sessiun d'avust 2013 ha il cussegl grond surdà a la regenza ina incumbensa che pretenda da cumplettar las explicaziuns da votaziuns chantunalas cun ina indicaziun dals meds legals che permetta da far recurs cunter questas explicaziuns. Da nov duess il carnet da votar inditgar entaifer tge termin, cun tge med legal e davant tge instanza che las explicaziuns dal cussegl grond davart ils projects da votaziun chantunals pon vegnir contestadas. Perquai ch'i manca ina basa giuridica suffizienta per quest intent, propona la regenza ina revisiun parziala da la lescha davart ils dretgs politics. Tenor quella duai la dretgira administrativa esser cumpetenta per giuditgar recurs che cuntegnan contestaziuns formalas u materialas dal carnet da votar. Ord vista da la politica da stadi e dal dretg public è la dretgira administrativa la suletta instanza chantunala che vegn en dumonda per quest intent. I sto vegnir evità che la regenza haja da giuditgar il cumportament dal cussegl grond. Per il recurs davant la dretgira administrativa prevesa il sboz da la lescha in termin da 3 dis – sco per tut ils recurs da votaziun e recurs electorals sin plaun chantunal e federal. 

D'ina indicaziun dals meds legals poi vegnir desistì
Tras quai che la lescha davart ils dretgs politics vegn cumplettada cun la pussaivladad da far recurs cunter las explicaziuns da votaziun, poi – tenor l'avis da la regenza – vegnir desistì d'inditgar ils meds legals en questas explicaziuns. Da nov mussa la lescha en moda transparenta e suandabla, davant tge instanza ed entaifer tge termin ch'ins po far recurs cunter las explicaziuns da votaziun chantunalas. L'obligaziun da stuair agiuntar en tut las explicaziuns da votaziun er anc ina indicaziun dals meds legals para per quest motiv nunnecessaria. Ina clera maioritad da las posiziuns da la consultaziun è stada dal medem avis. Plinavant avess ina tala regulaziun chantunala er consequenzas per las vischnancas. La gronda part da las vischnancas en il chantun fissan medemamain obligadas da munir las explicaziuns da votaziun communalas cun ina indicaziun dals meds legals. Sch'ina vischnanca vuless evitar quai, stuess ella reglar quai en il dretg communal. Cun la missiva vegn il cussegl grond pia dumandà anc ina giada, sche l'introducziun d'ina indicaziun stringenta dals meds legals è raschunaivla ed adequata. Sch'el è da l'avis che quai saja uschia, sto la lescha davart ils dretgs politics vegnir cumplettada cun in alinea correspundent.

Il cussegl grond vegn a tractar il project da la regenza durant la sessiun d'avrigl 2015. La revisiun da la lescha duai entrar en vigur il 1. da schaner 2016. 
 

Infurmaziuns:
chancelier dr. Claudio Riesen, tel. 081 257 22 21, e-mail Claudio.Riesen@staka.gr.ch  


Gremi: regenza
Funtauna: rg chanzlia chantunala dal Grischun
Neuer Artikel