Cuntegn da la pagina

Tenor la cumissiun è l'iniziativa da linguas estras nunvalaivla

  • Erste Mitteilung
  • Neuen Beitrag einfügen
La cumissiun per furmaziun e cultura ha predeliberà la missiva da la regenza tar l'iniziativa chantunala dal pievel "Mo ina lingua estra en la scola primara" per mauns dal cussegl grond. Ella è entrada unanimamain sin il project e recumonda al cussegl grond – cun ina decisiun da maioritad – da declerar l'iniziativa per nunvalaivla.

La cumissiun dal cussegl grond per furmaziun e cultura ha – sut il presidi dal president da la cumissiun Luca Tenchio – predeliberà la missiva da la regenza tar l'iniziativa chantunala dal pievel "Mo ina lingua estra en la scola primara" (iniziativa da linguas estras). A duas sesidas èn sa participads er il president da la regenza Martin Jäger e la secretaria da ses departament. La cumissiun è entrada unanimamain sin il project e recumonda al cussegl grond – cun ina decisiun da maioritad – da declerar l'iniziativa per nunvalaivla.

La proposta da declerar l'iniziativa da linguas estras tenor la missiva per nunvalaivla sa basa sin in'expertisa che vegn a la conclusiun che l'iniziativa cuntrafetschia evidentamain al dretg federal e chantunal. Cun 7 cunter 4 vuschs ed en enconuschientscha dals cunterarguments dal comité d'iniziativa è la maioritad da la cumissiun vegnida a la conclusiun che l'iniziativa stoppia vegnir declerada per nunvalaivla tenor l'art. 14 al. 1 da la constituziun chantunala. Ord vista da la maioritad da la cumissiun violescha l'iniziativa l'unitad da la furma e stat evidentamain en cuntradicziun cun il dretg surordinà. L'iniziativa da linguas estras violescha plinavant l'art. 8 al. 2 da la constituziun federala, tenor il qual nagin na dastga vegnir discriminà pervia da la lingua. Tras la restricziun ad englais sco unica lingua estra obligatorica en il territori tudestg ed a tudestg sco unica lingua estra obligatorica en il territori rumantsch e talian resultass in tractament giuridicamain inegual da las scolaras e dals scolars tar la midada al stgalim superiur. Ultra da quai n'è l'iniziativa evidentamain betg cumpatibla cun l'art. 3 da la constituziun chantunala, tenor il qual tut las trais linguas chantunalas èn equivalentas. Il Grischun cun sias trais linguas chantunalas dischavantagiass las scolaras ed ils scolars rumantschs e talians, sche quels avessan sin il stgalim primar mo tudestg sco lingua estra obligatorica. Uschia survegniss la lingua tudestga numnadamain dapli impurtanza ch'il rumantsch ed il talian. La minoritad da la cumissiun, che ha proponì da declerar l'iniziativa da linguas estras per valaivla, dubitescha che l'iniziativa cuntrafetschia evidentamain al dretg surordinà.

Il cussegl grond vegn a tractar l'iniziativa da linguas estras en la sessiun d'avrigl 2015. 
 

Infurmaziuns:
president da la cumissiun Luca Tenchio, tel. 081 252 44 82


Gremi: cumissiun per furmaziun e cultura
Funtauna: rg cumissiun per furmaziun e cultura
Neuer Artikel