Ina delegaziun dal parlament dal Tirol dal sid ha visità oz durant la sessiun d'avrigl 2015 il cussegl grond dal Grischun.
La delegaziun da 9 persunas dal Tirol dal sid è vegnida manada dal president dal parlament Thomas Widmann. Quel è vegnì accumpagnà da la commembra e dals commembers dal presidi Maria Hochgruber Kuenzer, Helmuth Renzler e Roland Tinkhauser sco er da quatter parsuras da fracziuns e dad in collavuratur dal parlament.
Ils giasts dal Tirol dal sid èn vegnids beneventads dal president dal cussegl grond Duri Campell e dal vicepresident dal cussegl grond Vitus Dermont. Ultra da quai han prendì part a l'inscunter ils presidents da las fracziuns dal Grischun.
L'avantmezdi ha la delegaziun assistì a las tractativas currentas en l'edifizi dal cussegl grond. Al gentar cuminaivel che ha gì lieu suenter è er stà preschent il president da la regenza grischuna Martin Jäger. Il program dal suentermezdi è deditgà al barat d'opiniuns politicas. Ils temas che vegnan tractads cuvran en spezial ils secturs da la democrazia directa e da las instituziuns. La visita da la delegaziun serva al barat d'experientschas sco er a la tgira da las relaziuns transcunfinalas tranter vischins.
Fotografias agiuntadas:
Buns contacts tranter Cuira e Bulsaun: Il president dal cussegl grond Duri Campell ed il president dal parlament dal Tirol dal sid Thomas Widmann (a dretga).
La delegaziun grischuna e la delegaziun dal Tirol dal sid cun il president dal cussegl grond Duri Campell, il president dal parlament dal Tirol dal sid Thomas Widmann ed il president da la regenza Martin Jäger (da sanestra) davant l'entrada da l'edifizi dal cussegl grond.
Gremi: chanzlia chantunala
Funtauna: rg chanzlia chantunala