Ier, il di il pli baud pussaivel per inoltrar propostas electoralas per las elecziuns dal cussegl naziunal, èn entradas tar la chanzlia chantunala dal Grischun 13 glistas cun propostas electoralas. Oz mardi suentermezdi, ils 19 da matg 2015, vegn tratg per l'emprima giada la sort per attribuir ils numers a las glistas. Ils resultats vegnan alura publitgads en l'internet sin www.gr.ch.

Per numerar las glistas per las elecziuns dal cussegl naziunal è decisiva en il chantun Grischun la successiun, en la quala las glistas electoralas vegnan inoltradas. Sche pliras glistas electoralas vegnan inoltradas il medem di, decida la sort davart la numeraziun.

Ier glindesdi, ils 18 da matg 2015, è stà il di il pli baud pussaivel per inoltrar propostas electoralas. Totalmain èn entradas 13 glistas tar la chanzlia chantunala dal Grischun. Oz mardi suentermezdi, ils 19 da matg 2015, tira la chanzlia chantunala per l'emprima giada la sort per attribuir ils numers a las glistas. Ils resultats vegnan alura publitgads en l'internet sin www.gr.ch. Il numer vegn attribuì a la glista avant la controlla da las propostas electoralas per las elecziuns dal cussegl naziunal. L'attribuziun ha pia lieu cun resalva che la glista inoltrada saja valaivla.

Ulteriuras propostas electoralas pon vegnir inoltradas fin l'ultim termin, vul dir glindesdi, ils 3 d'avust 2015. L'ultim di per midar las glistas inoltradas e per declerar colliaziuns da glistas è ils 10 d'avust 2015. Las elecziuns dal cussegl naziunal han lieu ils 18 d'october 2015. 
 

Remartga per las medias:
Ils resultats pon vegnir consultads a partir da las 15.30 sin www.gr.ch. Las collavuraturas ed ils collavuraturs da las medias ch'èn interessads pon esser preschents, cur che la sort vegn tratga per attribuir ils numers da las glistas. La sort vegn tratga oz mardi suentermezdi, ils 19 da matg 2015, a partir da las 14.15, en la sala da la regenza (chasa grischa, 2. plaun) a Cuira. Per plaschair s'annunziar per e-mail tar Tamara.Kobler@staka.gr.ch. 
 

Infurmaziuns:
- Walter Frizzoni, vicechancelier, chanzlia chantunala dal Grischun, tel. 081 257 22 22, e-mail: Walter.Frizzoni@staka.gr.ch  

Gremi: chanzlia chantunala dal Grischun
Funtauna: rg chanzlia chantunala dal Grischun