Cuntegn da la pagina

"Agenda 2030 Grischun" – elavurà set strategias per il svilup da l'economia regiunala dal Grischun

  • Erste Mitteilung
  • Neuen Beitrag einfügen
Avant in onn è vegnì inizià il process "Agenda 2030 Grischun". Il motiv per iniziar quest process è la concurrenza tranter ils lieus pli dira sco er l'unitad regiunala concernent il svilup da la regiun. Las vischnancas grischunas, las regiuns ed il chantun èn s'occupads en quest process cuminaivlamain cun il svilup regiunal a lunga vista. Ussa èn avant maun strategias per il svilup da l'economia per set spazis economics.

En stretga collavuraziun cun las vischnancas e cun las corporaziuns regiunalas sco er cun l'uffizi chantunal per il svilup dal territori ha l'uffizi per economia e turissem (UET) lantschà il matg 2014 il process "Agenda 2030 Grischun". La finamira è stada quella d'elavurar strategias per il svilup da l'economia regiunala. Il secretariat da stadi per l'economia (SECO) ha sustegnì l'iniziativa en il rom d'in project da pilot.

Las sfidas per il chantun e per sias regiuns sco er la concurrenza tranter ils spazis da viver ed ils spazis economics daventan pli grondas. Per dumagnar questas sfidas dovri cleras ideas davart il svilup futur ed ina realisaziun sistematica da mesiras adattadas.

La finamira da la "Agenda 2030 Grischun" è ina chapientscha cuminaivla da la situaziun da partenza, da las perspectivas per l'avegnir e da mesiras pussaivlas che mainan al svilup giavischà d'ina regiun. Ina premissa impurtanta per quai è la stretga collavuraziun tranter las vischnancas e las regiuns sco er cun il chantun. Pervia da lur autonomia han las vischnancas ina funcziun impurtanta en quest process. Ellas stgaffeschan cundiziuns generalas optimalas per la populaziun e per l'economia e furneschan prestaziuns preliminaras correspundentas.

En set spazis economics funcziunals han represchentantas e represchentants da la politica e da l'economia regiunala analisà ensemen cun il chantun la situaziun da partenza e las tendenzas dal svilup. Sin basa da lur enconuschientschas han ellas ed els alura definì la direcziun ed han elavurà strategias e mesiras regiunalas. Ina gruppa directiva da 15 persunalitads dal chantun ha sustegnì quest process cun ses cussegls. Actualmain vegnan las strategias deliberadas da las autoritads communalas ed alura publitgadas en las regiuns.

Las strategias elavuradas servan sco basa per exequir la nova politica regiunala (NPR) da la confederaziun. Ellas vegnan integradas en il program chantunal per realisar la NPR 2016-2023 che vegn suttamess a la confederaziun per l'approvaziun. Las strategias servan en il futur a las autoritads localas e regiunalas sco agid d'orientaziun en cas da dumondas e da decisiuns davart la politica dal lieu.

Il cusseglier guvernativ Jon Domenic Parolini punctuescha l'impurtanza da questas strategias per concepir il svilup economic en las regiuns. Ellas duain vegnir concretisadas anc pli fitg ed er vegnir resguardadas sco basa per conceder contribuziuns regiunalas per realisar infrastructuras relevantas per il sistem.

La realisaziun da las strategias e da las mesiras è ina sfida e pretenda ina priorisaziun. Ultra da la dumonda da la finanziabladad sto er vegnir resguardà il rom legal en ils differents secturs politics. En in proxim pass stoi vegnir sclerì, en tge furma che las enconuschientschas pon vegnir tratgas a niz per ulteriurs instruments chantunals relevants, sco per exempel per ils plans directivs regiunals. Cun quai vul il chantun cuntanscher per tut ils plauns statals ina segirezza da planisaziun pli gronda per strategias e per projects da lunga durada sco er meglieraziuns da las premissas per investiziuns. 
   
Ulteriuras infurmaziuns: uffizi per economia e turissem
 

Infurmaziuns:
- cusseglier guvernativ Jon Domenic Parolini, schef dal departament d'economia publica e fatgs socials, tel. 081 257 23 01, e-mail: Jondomenic.parolini@dvs.gr.ch  
- Eugen Arpagaus, manader da l'uffizi per economia e turissem, telefon 081 257 23 77, e-mail: Eugen.Arpagaus@awt.gr.ch 
 

Gremi: uffizi per economia e turissem dal Grischun
Funtauna: rg uffizi per economia e turissem dal Grischun
Neuer Artikel