Navigation

Inhaltsbereich

  • Erste Mitteilung
  • Neuen Beitrag einfügen
En sia ultima sesida ha la regenza grischuna prendì posiziun tar projects da revisiun da la confederaziun. Ultra da quai sustegna ella la creaziun d'in organisatur da viadis en il Grischun e la cuntinuaziun da la classa da tscherna da professiun Plus a Trun. 

La regenza refusa in augment da las commembras e dals commembers dal cussegl federal da set a nov
La regenza grischuna prenda posiziun tar l'iniziativa parlamentara da la cumissiun d'instituziuns politicas dal cussegl naziunal concernent ina represchentanza adequata da las cuminanzas linguisticas en in cussegl federal cun nov commembras e commembers.
Da princip sto ina represchentanza adequata da las cuminanzas linguisticas en il cussegl federal vegnir beneventada ord vista dal chantun Grischun triling. Ma questa finamira po er vegnir cuntanschida, sch'il cussegl federal consista sco enfin ussa da set commembras e commembers. In augment dal dumber da commembras e commembers dal cussegl federal a nov n'è ni necessari ni cunvegnent. In augment avess il dischavantatg che las singulas commembras ed ils singuls commembers dal cussegl federal avessan pli pitschnas pussaivladads d'influenzar la regenza cumplessiva e sa concentrassan pli fitg sin lur agens departaments. Ina regenza pli gronda pudess funcziunar mo sut ina ferma direcziun d'ina presidenta u d'in president da la confederaziun. Ina tala structura mettess però en dumonda la moda da funcziun dal sistem colleghial svizzer, che presuma l'equivalenza da tut las commembras e da tut ils commembers da la regenza. Sch'ins engrondiss il cussegl federal, resultassan plinavant dapli interfatschas interdepartamentalas. Quai cumplitgass ils andaments en reguard material e temporal. Plinavant stoi vegnir constatà ch'in augment a nov cusseglieras e cussegliers federals chaschunass expensas supplementaras considerablas.
Il sistem actual cun set cusseglieras e cussegliers federals è sa cumprovà per gronda part. La garanzia d'ina represchentanza adequata da las differentas regiuns linguisticas e da las regiuns dal pajais en il cussegl federal ha funcziunà bain enfin ussa. La regenza grischuna è persvadida ch'er en il futur vegn mussada la voluntad politica necessaria per quai. 

La regenza beneventa las novaziuns da la confederaziun per cumbatter la lavur illegala
La regenza prenda posiziun tar la revisiun da la lescha federala davart las mesiras per cumbatter la lavur illegala (LLI). Ella beneventa las novaziuns che vegnan proponidas e che chaschunan en tscherts puncts meglieraziuns da l'execuziun. Ina meglieraziun cumplessiva da l'execuziun na spetga la regenza dentant betg.
Pervia dals instruments che stattan il mument a disposiziun èsi per part difficil da cumprovar singulas cuntravenziuns. La revisiun actuala creescha instruments executivs pli rigurus. Quai para gist a la regenza grischuna. Beneventadas vegnan particularmain la meglra collavuraziun tranter las autoritads participadas sco er l'intenziun da dar la cumpetenza da prender sancziuns directamain als organs da controlla chantunals. Ultra da quai duain las cundiziuns minimalas da salari e da lavur pudair vegnir realisadas meglier e pli svelt. 

La regenza sustegna la creaziun d'in organisatur da viadis en il Grischun
Or dal program da turissem dal Grischun 2014–2021 conceda la regenza ina contribuziun da promoziun da totalmain 800 000 francs per crear l'organisatur da viadis MANU Touristik ScRL. Il model da fatschenta da l'interpresa è concepì consequentamain per viadis da senioras e seniors.
MANU Touristik duai gidar al chantun Grischun a meglierar sia cumpetitivitad ed ad augmentar la valurisaziun, cunzunt durant il semester da stad che ha ina rendita pli flaivla. Entaifer tschintg onns duain vegnir vendidas 40 000 pauschalas d'ina emna; quai correspunda a 280 000 ernottaziuns ed ad ina svieuta da 34 milliuns francs. Las emnas pauschalas vegnan purschidas sco emprim en la destinaziun Tavau Claustra. A partir da l'onn proxim vegn il product extendì sin autras regiuns turisticas dal Grischun. La contribuziun chantunala serva a promover il svilup dal product ed a constituir l'organisaziun da distribuziun, exceptads èn purs custs da marketing e da distribuziun. Sch'il product ha success, restituescha l'organisatur da viadis ina part da la contribuziun da promoziun.
Il program da turissem dal Grischun 2014–2021 duai rinforzar sistematicamain il turissem en il Grischun. En il rom dal program dad otg onns vegnan promovids projects che han in grad d'innovaziun uschè aut sco pussaivel e che fan effect en il Grischun. 

La classa da tscherna da professiun Plus po cuntinuar
La regenza grischuna incumbensescha la Casa Depuoz a Trun da cuntinuar cun la classa da tscherna da professiun Plus (CTP+). Per l'onn da scola 2015/16 paja il chantun ina contribuziun da 705 000 francs.
La purschida da CTP+ è limitada a maximalmain tschintg plazzas. Ella sa drizza a scolaras e scolars cun grevas singularitads dal cumportament e cun problems psichics, che na pon betg pli vegnir instruids cun success en las instituziuns chantunalas da la scolaziun speziala previsas. La CTP+ duai evitar che questas scolaras e quests scolars bandunian memia baud il sistem da furmaziun e perdian l'access ad ina scolaziun professiunala. 

La SATE po porscher la scolaziun da bachelor "Photonics"
La regenza approvescha l'introducziun da la scolaziun da bachelor "Photonics" a la scola auta da tecnica ed economia SATE a Cuira. L'introducziun da la nova scolaziun duai rinforzar las scolaziuns tecnicas sin il stgalim da scola auta spezialisada en il Grischun e far or da la SATE ina ferma partenaria regiunala per las interpresas pitschnas e mesaunas. Ultra da quai duai vegnir intensivà il transfer da savida e da tecnologia. Pretensiuns correspundentas avevan fatg ils manaschis industrials dal Grischun. Plinavant è la nova purschida da scolaziun accordada cun il rapport davart il svilup economic da la regenza. La nova scolaziun po vegnir purschida a partir da l'onn da scola 2016/17. Quai cun la resalva ch'er il cussegl da scola auta da la scola auta spezialisada da la Svizra orientala (SASSO) approveschia la scolaziun. 
 
 
Gremi: regenza
Funtauna: rg chanzlia chantunala dal Grischun
Neuer Artikel