Zum Seiteninhalt

Las vits sa dasdan dal sien d'enviern

  • Erste Mitteilung
  • Neuen Beitrag einfügen
La primavaira mussan las vits l'emprim segn da vita cun "cridar". Mez avrigl s'avra precautamain l'emprima feglia ed il matg plantan ils viticulturs novas vits. En ina seria da films documentescha la chanzlia chantunala dal Grischun la viticultura al Plantahof a Landquart durant l'onn 2015.

Cur ch'il funs sa stgauda la primavaira e cur che la temperatura da l'aria s'augmenta, sorta aua dals lieus, nua che las vits èn vegnidas tagliadas. Las vits cridan. Quest liquid consista praticamain per 100 pertschient d'aua e cuntegna mo quantitads minimalas da substanzas mineralas e da zutger. Quai è l'emprim segn da vita da la vit, cur ch'ella sa dasda dal "sien d'enviern".

La segunda mesadad d'avrigl cumenzan ils brumbels da las vits a crescher e bainbaud prui d'els l'emprima feglia tenera. Il cumenzament creschan las frastgas giuvnas da las vits plaun. Cur che las temperaturas s'augmentan creschan ellas pli svelt, ina cumprova che la vit tutga tar las plantas che aman il chaud.

Suenter ina durada da vita da 40 fin 50 onns èsi ura e temp da renovar la vigna. L'atun suenter la vendemia vegnan perquai stratgas ora las vits che han purtà lur prestaziun, la construcziun da fildarom vegn demontada ed il terren vegn preparà per la nova plantaziun la primavaira. L'avrigl vegn la parcella stajada, pitgas da metal vegnan chatschadas en il terren, nua che las vits giuvnas vegnan emplantadas pli tard. La distanza tranter las retschas importa var 2 meters, da vit a vit 80 fin 90 centimeters. Cur ch'il terren è sa stgaudà il matg, fa il viticultur ina fora cun la pala, metta la vit giuvna en quella e zuglia las ragischs precautamain cun terra. Uschia vegn tschentà il fundament per la proxima generaziun da vits da quatter fin tschintg decennis. 


Infurmaziuns:
Hans Jüstrich, post spezialisà per pumicultura e viticultura al Plantahof, tel. 081 257 60 60, e-mail: hans.juestrich@plantahof.gr.ch  
 

Gremi: Plantahof
Funtauna: rg Plantahof
Neuer Artikel