Navigation

Inhaltsbereich

  • Erste Mitteilung
  • Neuen Beitrag einfügen
Pretensiuns impurtantas da la regenza grischuna en la consultaziun a la conferenza da las regenzas chantunalas (CdC) tar l'iniziativa dal pievel "Cunter l'immigraziun da massa" n'èn betg vegnidas resguardadas. Per la regenza èsi impurtant da communitgar sia tenuta en la dumonda da contingents, la quala divergescha da la CdC. Ses arguments ha ella plinavant tramess directamain al departament federal cumpetent.

Per la consultaziun cuminaivla a la confederaziun ha la regenza proponì a la CdC adattaziuns en il sboz per realisar l'iniziativa dal pievel "Cunter l'immigraziun da massa". A favur da l'economia da construcziun e da turissem indigena ha ella pretendì che forzas da lavur da la UE/AECL, che han permissiuns da dimora curta fin a 10 mais, vegnian exceptadas d'ina contingentaziun.
Ils 9 da favrer 2014 ha il pievel svizzer acceptà l'iniziativa "Cunter l'immigraziun da massa". Tenor questa iniziativa duai la Svizra reglar sezza l'immigraziun ed en spezial fixar contingents per lavurantas e lavurants esters. La confederaziun propona ch'ils contingents per lavurantas e lavurants esters da la UE/AECL duain valair gia a partir d'ina dimora da passa 4 mais. La regenza grischuna percunter vul ch'ils contingents valian pir a partir d'ina dimora da passa 10 mais. Uschia na quintassan lavurantas e lavurants esters da la UE/AECL betg tar ils contingents, sch'ellas ed els na lavurassan betg pli ditg che maximalmain 10 mais en Svizra. En cas d'ina contingentaziun pli severa gia a partir d'ina dimora da 4 mais ristgass ins da betg pli pudair recrutar avunda forzas da lavur. Plinavant stuessan ils lavurants da construcziun esters vegnir remplazzads ed instruids da nov entaifer la medema stagiun.
Cunzunt en il turissem ed en la branscha da construcziun, ma er en l'agricultura dovra il chantun Grischun lavurantas e lavurants esters. Lavurantas e lavurants indigens n'hai insumma betg u betg avunda per quests secturs.
Arguments per la pretensiun da dimoras pli lungas senza contingent èn plinavant il fatg che la branscha da construcziun e dal turissem dependa da la stagiun e che questas persunas na sa domicilieschan betg en Svizra sco lavurantas e lavurants stagiunals. La proposta da la regenza exprima la circumstanza ch'il Grischun sco chantun muntagnard e turistic è pertutgà particularmain da l'iniziativa. 

Adattà la procedura d'admissiun per scolas grischunas da talents
Ils criteris per l'admissiun ad ina scola grischuna da talents vegnan midads. La regenza grischuna ha approvà ina revisiun parziala correspundenta da l'ordinaziun davart la procedura d'admissiun en classas da talent. Da nov n'èsi betg pli pussaivel d'entrar excepziunalmain senza examen en ina tala scola. Plinavant vegn la media da notas, che sto vegnir cuntanschida, auzada da 4 sin 4.5, e la part da l'examen "test da motivaziun" vegn concepida da nov. Cumpetentas per decisiuns d'admissiun èn en l'avegnir las scola da talents.
Tras las adattaziuns tegna il chantun quint dal fatg ch'il dumber d'annunzias per l'examen d'admissiun è s'augmentà. En vista a las annunzias actualas per l'examen d'admissiun da quest onn ed en vista a la quota da success che resulta uschia, na sa lascha betg pli dir cun tschertezza che la purschida da plazzas en las scolas grischunas da talents bastia en l'avegnir. Per la procedura d'admissiun è perquai vegnida tschernida ina soluziun pragmatica che ha la basa giuridica respectiva. 

Rapport dal cumissari da la regenza per Bravuogn
La regenza ha prendì enconuschientscha dal rapport dal cumissari da la regenza per la vischnanca da Bravuogn. Il motiv per in cumissari èn stadas renfatschas da la cumissiun da gestiun communala envers la suprastanza communala. En il center da las differenzas steva l'adattaziun dals pretschs per la furniziun da stalizzas per l'implant da chalur a distanza che vegn manà da la vischnanca. Sco cumissari da la regenza era vegnì nominà l'advocat Thomas Nievergelt da Samedan.
En ses rapport ha il cumissari da la regenza examinà, sche las renfatschas sajan plausiblas, ha tratg conclusiuns e fatg recumandaziuns. El ha fatg interrogaziuns tant cun ils commembers da las autoritads communalas involvidas sco er cun il represchentant dal furnitur da laina.
Il cumissari da la regenza vegn a la conclusiun ch'in augment dal pretsch saja stà admissibel. Percunter saja dubitaivel, sche quest augment saja cuvrì en questa dimensiun tras il contract. En il rom da l'adattaziun dal pretsch avess stuì vegnir eliminada questa intschertezza contractuala. L'infurmaziun da la radunanza communala sco er da l'uffizi da vischnancas davart questa fatschenta saja stada insuffizienta. Il cumissari da la regenza vegn incumbensà da la regenza d'orientar, ensemen cun l'uffizi da vischnancas, la suprastanza communala, la cumissiun da gestiun sco er la radunanza communala da Bravuogn davart il rapport. 

Sustegn finanzial per il resort da vacanzas Pradas a Breil
La regenza garantescha a la Breil Resort SA ina contribuziun chantunala dad 1,7 milliuns francs per construir il resort da vacanzas Pradas a Breil.
Il resort duai stgaffir a Breil 578 letgs supplementars e generar 63 000 pernottaziuns supplementaras per onn. En in'emprima etappa vegnan construidas 16 chasas cun 84 abitaziuns. In'ulteriura etappa vegn realisada, uschespert ch'il resort vegn manà cun success. Ils custs d'investiziun dal project importan tut en tut passa 53 milliuns francs; l'avertura è planisada il december 2015.
Il chantun po sustegnair cun contribuziuns e cun emprests da daners projects impurtants per l'economia regiunala u spezialmain innovativs d'interpresas d'alloschament. Questas contribuziuns importan maximalmain 25 pertschient dals custs d'investiziun.
-
Resort da vacanzas Pradas a Breil © Breil Resort SA 

Approvà il project cunter crudada da crappa e cunter lavinas "Crap Sot igls Munts"
La regenza approvescha il project cunter crudada da crappa e cunter lavinas "Crap Sot igls Munts" da la Viafier retica. Als custs vegn garantida ina contribuziun chantunala da maximalmain 637 500 francs.
La finamira dal project è quella da garantir en moda persistenta la protecziun da la lingia da l'Alvra da la Viafier retica. La lingia da l'Alvra vala sco axa da traffic principala en direcziun da l'Engiadina ed ha cun circa 50 trens per di ina gronda intensitad da traffic. Las ovras da protecziun existentas en il territori "Crap Sot igls Munts" èn vegnidas construidas avant plirs decennis ed èn ussa en in fitg nausch stadi. Sin basa da questas circumstanzas ha la Viafier retica incumbensà il chantun d'examinar e d'elavurar mesiras tecnicas per reducir la situaziun da privel. 

La regenza approvescha trais projects per la protecziun cunter aua gronda a Saas
Ils projects da la vischnanca da Saas da l'avrigl 2015 per construir rempars en l'aual da Feschgels, en l'aual da Martisch Gaden ed en il Grafenbach vegnan approvads cun differentas cundiziuns. Tut en tut vegn garantida ina contribuziun chantunala da maximalmain 452 900 francs.
Ils projects han la finamira da reducir il privel d'aua gronda en la vischnanca da Saas. La stad 2013 hai dà in ferm urizi sur l'intschess respectiv. Tras questas precipitaziuns han ils auals purtà aua gronda e blera glera. En differents lieus è l'aua ida sur ils letgs dals auals ora, ha inundà ils conturns e chaschunà donns correspundents. Quest eveniment ha mussà che tuts trais auals han in deficit areguard la protecziun cunter aua gronda.
-
Inundaziuns 2013 a Saas: Aual da Feschgels,
aual da Martisch Gaden e Grafenbach (da sanestra) 


Gremi: regenza
Funtauna: rg chanzlia chantunala dal Grischun
Neuer Artikel