Il rapport da sanadad 2015 dal chantun Grischun ch'è gist cumparì dat ina invista cumplessiva da la situaziun da sanadad da la populaziun grischuna. Ils resultats sumeglian en bleras parts fitg quels da l'ulteriura Svizra. Tar in pèr puncts però è il chantun Grischun cleramain meglier.
Il chantun Grischun ha incumbensà l'observatori svizzer da sanadad (Obsan) d'evaluar l'enquista svizra davart la sanadad, ch'è vegnida fatga l'onn 2012, specificamain per il chantun Grischun. Il rapport da sanadad ch'è resultà è ussa avant maun. I èn vegnidas analisadas las datas da l'enquista da passa 650 Grischunas e Grischuns. Il rapport infurmescha en spezial davart il stadi da sanadad da la populaziun, davart ils aspects che sa refereschan a la sanadad en il sectur d'abitar e da lavur, davart il diever da prestaziuns da sanadad e davart ils custs e las premias da l'assicuranza obligatorica per la tgira da persunas malsaunas.
En trais secturs ha il chantun Grischun tut en tut cleramain ina meglra bilantscha cumpareglià cun la Svizra: Las Grischunas ed ils Grischuns han main grevezzas psichicas che las Svizras ed ils Svizzers ed ellas ed els consumeschan main medicaments. Ultra da quai èn ils custs chantunals sco er las premias da l'assicuranza obligatorica per la tgira da persunas malsaunas pli bass che la media svizra.
La gronda maioritad da las persunas interrogadas en il chantun (86 pertschient) sa senta tut en tut bain fin fitg bain en quai che reguarda la sanadad. Il rapport scuvra però er grevezzas da la sanadad: 30 pertschient da las persunas interrogadas en il chantun inditgeschan d'avair problems da sanadad permanents e passa 40 pertschient d'avair surpais.
Il rapport da sanadad sa drizza tant a represchentantas e represchentants da la politica e dals fatgs da sanadad sco er a tut las abitantas ed ils abitants interessads dal chantun. Per l'ina duai il rapport promover l'occupaziun conscienta cun il tema "sanadad" e sensibilisar la populaziun per in cumportament che promova la sanadad. Per l'autra serva el als posts cumpetents sco basa per realisar mesiras che promovan la sanadad, ch'èn preventivas e curativas.
Il rapport po vegnir retratg en furma scritta tar l'uffizi da sanadad dal chantun Grischun, Planaterrastrasse 16, 7000 Cuira (
info@san.gr.ch) u sco datoteca da PDF sin la pagina d'internet da l'observatori svizzer da sanadad (
www.obsan.admin.ch).
Infurmaziuns:
Cusseglier guvernativ Christian Rathgeb, schef dal departament da giustia, segirezza e sanadad, tel.: 081 257 25 01, e-mail:
Christian.Rathgeb@djsg.gr.ch
Funtauna: departament da giustia, segirezza e sanadad
Funtauna: rg departament da giustia, segirezza e sanadad