Navigation

Inhaltsbereich

  • Erste Mitteilung
  • Neuen Beitrag einfügen
Pervia dal grond dumber da requirentas e requirents d'asil che vegnan assegnads da la confederaziun, èn ils centers collectivs dal chantun occupads fermamain. Per ch'i stettian a disposiziun ils proxims mais avunda plazzas da collocaziun, avra il chantun danovamain il stabiliment militar da truppas per la protecziun civila a Cuira. Il stabiliment avra oz sias portas.

Dapi il matg da quest onn vegn registrà in augment extraordinari da requirentas e requirents d'asil che vegnan assegnads da la confederaziun al chantun. I sa tracta da persunas da differents pajais cun ina gronda quota da protecziun, en spezial da l'Eritrea. Ina gronda part da questas persunas vegn previsiblamain a restar pli ditg en Svizra, cunquai che fitg paucas dad ellas pon vegnir tramessas enavos en auters pajais europeics sin fundament da la cunvegna existenta da Dublin. Per pudair garantir la capacitad d'admissiun e da collocaziun en cas ch'il dumber da dumondas d'asil è constantamain aut u crescha, è il chantun Grischun sfurzà da collocar temporarmain las persunas assegnadas en stabiliments da protecziun civila.

Sco alloschi temporar adequat stat a disposiziun il stabiliment militar da truppas per la protecziun civila Plankis en il plaun sutterran dal lavuratori da la ARGO a la Emserstrasse a Cuira. Quest alloschi è gia stà en funcziun senza problems da l'october 2014 fin il mars 2015. Il stabiliment da protecziun civila ch'è en proprietad da la citad da Cuira na vegn dapi intgins onns betg pli utilisà dal militar. Per l'assistenza da las requirentas e dals requirents d'asil èn cumpetentas las collavuraturas ed ils collavuraturs da l'uffizi da migraziun e da dretg civil. Sustegnids vegnan ellas ed els da commembers da la protecziun civila.


Infurmaziuns:

- cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail: Christian.Rathgeb@djsg.gr.ch
- president da la citad Urs Marti, citad da Cuira, tel. 081 254 41 01, e-mail: Urs.Marti@chur.ch
- Marcel Suter, manader da l'uffizi da migraziun e da dretg civil, tel. 079 331 66 62, e-mail: Marcel.Suter@afm.gr.ch


Gremi: regenza
Funtauna: rg chanzlia chantunala dal Grischun
Neuer Artikel