Sin invit da la regenza ha l'ambassadur da la Belgia en Svizra, Frank Recker, visità oz il chantun Grischun.

L'ambassadur beltg Frank Recker è vegnì beneventà oz en la chasa grischa a Cuira dal president da la regenza Martin Jäger e dal chancelier Claudio Riesen. L'ambassadur vegn accumpagnà da l'attasché d'economia Michel Patteet e dal consul onurari Bruno Bauer. Suenter il barat dals salids uffizials è in gentar cuminaivel stà sin il program.

La regenza grischuna tgira annualmain contacts cun represchentantas e represchentants da stadis esters en Svizra. Quests discurs èn elements impurtants da las relaziuns dal chantun cun l'exteriur. Cun ils stadis vischins e cun pajais che han relaziuns spezialas cun la Svizra e cun il Grischun vegnan savens discutadas dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

Fotografia agiuntada: L'ambassadur Frank Recker (segund da sanestra) vegn – accumpagnà da l'attasché d'economia Michel Patteet (amez) e dal consul onurari Bruno Bauer – beneventà dal president da la regenza Martin Jäger (a sanestra) sco er dal chancelier Claudio Riesen (a dretga).


Gremi: regenza
Funtauna: rg chanzlia chantunala dal Grischun