La regenza lantscha la consultaziun tar la revisiun totala da la lescha chantunala da sanadad. Ultra da quai approvescha ella il nov concessiunament da l'ovra electrica Morteratsch da la Repower SA sco er l'introducziun da la scolaziun da bachelor "architectura" a la scola auta da tecnica ed economia SATE a Cuira.
Lantschada da la consultaziun tar la revisiun totala da la lescha chantunala da sanadad
La regenza ha lantschà la consultaziun tar il sboz per ina revisiun totala da la lescha da sanadad. La nova lescha da sanadad remplazza la lescha vertenta che datescha da l'onn 1984 e tegna quint dal svilup che ha gì lieu en ils fatgs da sanadad publics.
Il dretg chantunal vegn adattà a las prescripziuns dal dretg federal en ils secturs da la prevenziun, dal cumbat cunter epidemias e da la pratica da la professiun da las persunas spezialisadas dal sectur da sanadad. En la nova lescha da sanadad vegnan ultra da quai reglads pli detagliadamain ils dretgs e las obligaziuns da las pazientas e dals pazients envers il dretg vertent e la repartiziun da las incumbensas tranter las vischnancas ed il chantun vegn fixada en moda pli cumplessiva. La realisaziun dal servetsch d'urgenza, ch'è fin ussa stada chaussa da las medias e dals medis sco er da las dentistas e dals dentists, vegn surdada a las organisaziuns professiunalas respectivas. Plinavant èn vegnidas serradas largias ch'eran vegnidas constatadas en connex cun las disposiziuns pertutgant la surveglianza da la polizia da sanadad tras il chantun, en connex cun las disposiziuns penalas sco er en connex cun las mesiras disciplinaras.
La procedura da consultaziun tar il sboz per ina revisiun totala da la lescha davart ils fatgs da sanadad dal chantun Grischun (lescha da sanadad) vegn fatga dal departament da giustia, segirezza e sanadad. La consultaziun dura fin ils 31 da schaner 2016.
Consultaziuns currentas chantun Grischun
Approvà la revisiun parziala da l'ordinaziun chantunala davart l'examinaziun ecologica
La regenza ha approvà la revisiun parziala da l'ordinaziun chantunala davart l'examinaziun ecologica (OCEE). Questa ordinaziun chantunala regla las cumpetenzas da las persunas e dals uffizis ch'èn participads ad in'examinaziun ecologica e concretisescha lur dretgs e lur obligaziuns. Ultra da quai vegnan inditgadas las proceduras decisivas per organisar la EE per ils singuls tips da stabiliments. Cun la revisiun parziala vegn amplifitgada la glista dals stabiliments che dovran ina EE. Da nov vegnan integrads cunzunt manaschis industrials en la OCEE. Per quests stabiliments novs vegnan inditgadas las proceduras decisivas e las autoritads cumpetentas.
Il motiv per la revisiun parziala da la OCEE è la participaziun da la Svizra a la convenziun d'Aarhus. En questa convenziun sa tracti da l'access ad infurmaziuns e da la participaziun da la publicitad a las proceduras da decisiun en il sectur da l'ambient. Il zercladur 2014 èn entradas en vigur sin plaun federal midadas da la lescha davart la protecziun da l'ambient ch'èn colliadas cun la participaziun a la convenziun d'Aarhus. Pia è ussa vegnida adattada l'ordinaziun chantunala al dretg federal.
Approvà il nov concessiunament per l'ovra electrica Morteratsch da la Repower SA
La regenza ha approvà la concessiun dal dretg da las auas sco er il project da renovaziun per l'ovra electrica Morteratsch da la Repower SA. Il project per renovar l'ovra electrica Morteratsch prevesa in augment da la quantitad d'aua utilisada e pia in augment da la producziun annuala da 3,6 a 7 milliuns uras da kilowatt. Cun quai po en l'avegnir vegnir furnì current a circa 1500 chasadas per onn. L'ovra electrica Morteratsch po funcziunar a partir da l'avertura da la centrala da l'ovra electrica renovada per ulteriurs 60 onns. L'ovra electrica Morteratsch è vegnida messa en funcziun l'onn 1891 sco ina da las emprimas ovras idraulicas dal Grischun ed è il stabiliment il pli vegl dal parc d'ovras idraulicas da l'odierna Repower SA.
L'institut svizzer da retschertgas davart allergias ed asma survegn ina incarica da prestaziun
La regenza ha concedì a l'institut svizzer da retschertgas davart allergias ed asma (ISRA), in institut da la fundaziun instituziun da perscrutaziun dal clima autalpin e da la medischina (ISP), ina incarica da prestaziun per ils onns 2015 fin 2016. Per l'onn 2015 vegn pajada ina contribuziun chantunala da 143 950 francs e per l'onn 2016 vegnan garantids 290 000 francs. Quests pajaments da la contribuziun valan dentant cun la resalva ch'il preventiv vegnia acceptà dal cussegl grond. L'incarica da prestaziun vegn surdada sin basa da la nova lescha chantunala davart las scolas autas e la perscrutaziun.
Las activitads da perscrutaziun dal ISRA sa concentreschan sin l'analisa da las basas per malsognas allergicas ed asmaticas sco er da malsognas allergicas da la pel. Il ISRA surpiglia ina rolla directiva en la perscrutaziun dentant er en la colliaziun da fitg differents centers da cumpetenza naziunals. L'interess chantunal per ina finanziaziun fundamentala dal ISRA e quel da mantegnair a Tavau sco lieu da staziunament l'institut da perscrutaziun ch'è directiv sin plaun mundial e ch'è renconuschì.
La SATE po porscher la scolaziun da bachelor "architectura"
La regenza approvescha l'introducziun da la scolaziun da bachelor "architectura" a la scola auta da tecnica ed economia (SATE a Cuira). La scolaziun è vegnida elavurada en cooperaziun cun la scola auta spezialisada da Son Gagl (SAS). La scolaziun d'architectura previsa metta ils accents da scolaziun en ils secturs construcziun en il territori alpin, planisaziun dal maletg dal lieu ed edifizis turistics. La scolaziun vegn purschida sco studi cumplain da trais onns, sco studi parzial da quatter onns e sco cumbinaziun da studi cumplain e parzial da quatter onns. La nova scolaziun po vegnir realisada a partir da l'onn da scola 2017/18. Quai cun la resalva ch'er il cussegl da scola auta da la scola auta spezialisada da la Svizra orientala (SASSO) approveschia la scolaziun.
Garanzia da la contribuziun chantunala e federala per la Punt crap a Savogin
Per restaurar la Punt crap a Savognin ha la regenza deliberà ina contribuziun chantunala da maximalmain 39 000 francs. Da la cunvegna da program 2016-2020 vegn medemamain garantida ina contribuziun federala da 39 000 francs. La punt vegn ultra da quai messa sut protecziun da monuments chantunala.
La veglia punt a dus artgs che datescha da l'onn 1682 è in element impurtant dal maletg dal lieu da Savognin, ch'è valità sco d'impurtanza regiunala. La Punt crap collia dapi il 17. tschientaner las singulas parts dal vitg da Savognin. Ord vista dal chantun sto questa punt preziusa stuair vegnir mantegnida e tgirada sco caracteristica dal maletg dal lieu.
Punt Crap a Savognin
Gremi: regenza
Funtauna: rg chanzlia chantunala dal Grischun