Il premi da la ARGE ALP 2016 vul render attent a la publicitad il territori alpin sco regiun innovativa cun tradiziun ed uschia intimar anc dapli da far cooperaziuns en il territori alpin. Concretamain vegnan tschertgads projects innovativs en il sectur da l'occupaziun. En tut reparta ina giuria internaziunala ina summa da premi da 25 000 euros. Inoltrar projects pon uniuns, interpresas sco er instituziuns publicas e privatas, e quai fin ils 31 da schaner 2016. Tut las infurmaziuns pon vegnir consultadas sin www.argealp.org.

L'occupaziun è in tema che pertutga da princip tut las regiuns. Sco regiuns alpinas cun in caracter per gronda part rural stattan las regiuns da la ARGE ALP dentant davant sfidas particularas: en la concurrenza per forzas spezialisadas ston ellas far frunt a las grondas regiuns metropolitanas. Tant pli impurtant èsi da svegliar tar la glieud giuvna l'interess per in'occupaziun en la regiun e da trair a niz tut ils potenzials umans d'ina regiun.
La finamira da quest premi da la ARGE ALP è quella d'identifitgar e da premiar cooperaziuns resp. projects dal sectur tematic "occupaziun", che prestan ina contribuziun impurtanta per la cumpetitivitad ed uschia er per la qualitad da viver da las regiuns alpinas.

Vasta paletta da projects
La paletta da projects che vegnan pledentads cun il premi è sapientivamain vasta e tanscha per exempel da mesiras per sensibilisar uffants per la tecnica sur la collavuraziun tranter l'economia e la scola fin a la cumpatibilitad da la professiun cun la famiglia. L'impurtant è ch'ils projects sa basian sin ina cooperaziun.

Tgi po inoltrar projects?
Acturas pon esser corporaziuns territorialas regiunalas u localas (p.ex. vischnancas), uniuns, interpresas u autras organisaziuns e.u.v. ch'èn engaschadas en cooperaziuns. Las cooperaziuns che duain vegnir premiadas ston esser purtadas da differentas acturas (p.ex. vischnanca, uniun turistica, interpresas localas e.u.v.) ch'èn activas en ina moda che cumpiglia pliras branschas u temas. Er projects surregiunals pon vegnir inoltrads.

Termin d'inoltraziun
Ils projects pon vegnir inoltrads fin ils 31 da schaner 2016. La selecziun vegn fatga en dus pass: L'emprim elegia ina giuria regiunala maximalmain dus projects per mintga stadi commember da la ARGE ALP. Or da quests projects surdat lura ina giuria internaziunala ina summa da premi da totalmain 25 000 euros. Ils premis vegnan surdads en il rom da la conferenza dals schefs da las regenzas da la ARGE ALP il zercladur 2016 tras il parsura actual da la ARGE ALP, il guvernatur dal Vorarlberg Markus Wallner.

Ils projects pon vegnir inoltrads a la:
Chanzlia chantunala dal Grischun
Tamara Kobler
Servetsch da medias
Reichsgasse 35, CH 7001 Cuira
Tel. +41 81 257 22 28
E-mail: Tamara.Kobler@staka.gr.ch

Tut las infurmaziuns pon vegnir consultadas sin www.argealp.org.

En la cuminanza da lavur da las regiuns alpinas (ARGE ALP) collavuran ils suandants stadis federativs e chantuns sco er las provinzas dals quatter pajais Germania, Italia, Austria e Svizra cun ina populaziun totala da ca. 26 milliuns umans: Baviera, Grischun, Lumbardia, Salzburg, Son Gagl, Tessin, Tirol, Tirol dal sid, Trentino e Vorarlberg. www.argealp.org


Infurmaziuns:
Tamara Kobler, incumbensada per l'infurmaziun dal chantun Grischun, tel. 081 257 22 28, e-mail Tamara.Kobler@staka.gr.ch


Gremi: cuminanza da lavur da las regiuns alpinas
Funtauna: rg cuminanza da lavur da las regiuns alpinas