Sin invit da la regenza ha l'ambassadur da la Gronda Britannia en Svizra, David Moran, visità oz il chantun Grischun.

L'ambassadur da la Gronda Britannia David Moran è vegnì beneventà oz en la chasa grischa a Cuira dal president da la regenza Christian Rathgeb e dal chancelier Claudio Riesen. L'ambassadur è vegnì accumpagnà da Richard Ridout, il vicemanader da l'ambassada e consul general. Suenter il barat dals salids uffizials è in gentar cuminaivel stà sin il program.

La regenza grischuna tgira annualmain contacts cun represchentantas e represchentants da stadis esters en Svizra. Quests discurs èn elements impurtants da las relaziuns dal chantun cun l'exteriur. Cun ils stadis vischins e cun pajais che han relaziuns spezialas cun la Svizra e cun il Grischun vegnan savens discutadas dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

Fotografia agiuntada:

 

L'ambassadur David Moran (segund da sanestra) vegn – accumpagnà da Richard Ridout, il vicemanader da l'ambassada e consul general – beneventà en la chasa grischa dal president da la regenza Christian Rathgeb (a sanestra) e dal chancelier Claudio Riesen (a dretga).


Gremi: regenza
Funtauna: rg chanzlia chantunala dal Grischun