Ils confamigliars da persunas dependentas d'alcohol èn exposts ad in grond squitsch. Schebain ch'i dat en Svizra ina rait spessa da posts da cussegliaziun correspundents, tschertgan là mo var 4 pertschient dals confamigliars agid. L'acziun grischuna "Posta en buttiglia" che ha lieu ils 19 da matg 2016 en il rom dal "di naziunal davart ils problems d'alcohol" duai render pli enconuschentas las purschidas da sustegn existentas e dar curaschi als confamigliars da daventar activs.

Dapi l'onn 2011 han lieu mintga onn il matg en tut la Svizra acziuns pertutgant la prevenziun d'alcohol: l'onn 2016 è il motto dal di d'acziun naziunal: "Problems cun l'alcohol … e la famiglia?". En quest connex na stattan per ina giada betg en il center las persunas che pateschan d'ina dependenza, mabain lur confamigliars. Il motiv è il fatg trist che – malgrà ch'i existan purschidas – confamigliars pertutgads profitan mo da rar da las cussegliaziuns professiunalas. Turpetg ed aspectativas memia grondas envers sasez dastgassan esser ils motivs per questa reserva. La convivenza cun persunas dependentas d'alcohol ha savens per consequenza ch'ils confamigliars sa sentan surdumandads. Betg da rar pateschan els psichicamain u sviluppan schizunt sintoms corporals. Pli stretga che la convivenza da confamigliars è cun ina persuna che patescha d'ina dependenza e pli grondas che las chargias èn per regla.

Acziun grischuna "Posta en buttiglia"
En il Grischun datti ina purschida centrala ed ina purschida decentrala dals posts da cussegliaziun dals servetschs socials regiunals, dal servetsch social chantunal per dumondas da dependenza e dals posts da cussegliaziun da la Crusch blaua. Per dar curaschi als confamigliars da persunas dependentas d'alcohol dad ir per agid e per sustegn è vegnida sviluppada l'acziun grischuna "Posta en buttiglia" sco amplificaziun dal di d'acziun naziunal. En lieus elegids en il chantun vegn repartida ils 19 da matg 2016 ina posta en buttiglia a las passantas ed als passants. Il fegl sgulant ch'ella cuntegna dat cussegls per ils confamigliars da persunas dependentas d'alcohol. Ultra da quai cuntegna il fegl sgulant infurmaziuns davart ils posts da cussegliaziun chantunals e regiunals, nua ch'els sa chattan e lur numers da telefon.

Ulteriuras infurmaziuns: www.aktionstag-alkoholprobleme.ch  


Infurmaziuns:
Denise Rudin, manadra da partiziun "promoziun da la sanadad e prevenziun" tel. 081 257 64 02, e-mail denise.rudin@san.gr.ch


Gremi: uffizi da sanadad dal Grischun
Funtauna: rg uffizi da sanadad dal Grischun