Navigation

Inhaltsbereich

  • Erste Mitteilung
  • Neuen Beitrag einfügen
La cumissiun per sanadad e fatgs socials dal cussegl grond ha predeliberà il rapport da la regenza davart la finanziaziun dals ospitals e da la tgira en il chantun Grischun. Ella va d'accord cun la regenza da mantegnair il model da finanziaziun actual.

La sesida da la cumissiun per sanadad e fatgs socials (CSF) è vegnida manada da la deputada e presidenta da la cumissiun Christina Bucher-Brini. Er il president da la regenza Christian Rathgeb è sa participà a la sesida. Il rapport sa basa sin ina incumbensa da la CSF ch'il cussegl grond ha surdà a la regenza l'october 2011. Tenor quella stoppia la regenza examinar detagliadamain il sistem actual da la finanziaziun dals ospitals e da la tgira e far in rapport en chaussa.

La cumissiun ha discutà intensivamain il rapport ed è sa fatschentada minuziusamain cun las propostas da la regenza. Cun diesch cunter ina vusch è ella s'exprimida per mantegnair il model actual per la finanziaziun dals ospitals e da la tgira. Main concordia hai dà areguard las mesiras che la regenza ha proponì. Ina maioritad da la cumissiun refusa tant la mesira 1 (pussaivladad da differenziar la purschida en chasas da tgira) sco er la mesira 3 (cumpetenza da las vischnancas per la finanziaziun da deficits dals furniturs da prestaziuns). Ultra da quai refusa la cumissiun unanimamain la mesira 4. Quella prevesa che vischnancas surpiglian ils custs betg cuvrids mo, sche las chasas da tgira realiseschan las mesiras ch'èn fixadas en las cunvegnas da prestaziun per sbassar ils custs.

La finala n'è la cumissiun betg dal medem avis sco l'expert ch'i dettia anc potenzial da spargn tar il persunal da tgira. Bain prenda la cumissiun enconuschientscha dal fatg ch'il dumber effectiv da plazzas en tut il chantun è per 17 pertschient pli aut ch'il dumber da plazzas ordinà dal chantun. Ella na vesa però nagin potenzial da reducziun tar las plazzas, senza che la qualitad da la tgira vegniss uschia influenzada en moda negativa.

La CSF ha recepì il rapport da la regenza en moda positiva e considerescha sia incumbensa sco ademplida. Ella propona unanimamain al cussegl grond d'entrar en il project, da prender enconuschientscha dal rapport e da decider davart las propostas fatgas.

Il cussegl grond vegn a tractar questa fatschenta en la sessiun da zercladur 2016.


Infurmaziuns:
presidenta da la cumissiun Christina Bucher-Brini, 078 818 77 72


Gremi: cumissiun per sanadad e fatgs socials
Funtauna: rg cumissiun per sanadad e fatgs socials
Neuer Artikel