Navigation

Inhaltsbereich

  • Erste Mitteilung
  • Neuen Beitrag einfügen
En sia ultima sesida ha la regenza grischuna decidì da cumplettar il plan directiv chantunal cun il tema energia da vent. Plinavant ha ella relaschà la revisiun parziala da l'ordinaziun davart la protecziun d'uffants e da creschids ed approvà il project collectiv selvicultura 2016.

Cumplettaziun dal plan directiv chantunal en il sectur energia da vent
La regenza grischuna ha decidì da cumplettar il plan directiv chantunal cun il tema energia da vent. Tras la decisiun dal cussegl federal e dal parlament da sortir da l'energia nucleara survegn l'explotaziun dal potenzial da las energias regenerablas ina impurtanta paisa politica e sociala. Igl è da partir dal fatg che l'energia da vent vegnia a tschiffar dapli pe en Svizra ed er en il Grischun. Las consequenzas per la natira e per il maletg da la cuntrada sco er l'interess creschent per l'utilisaziun da l'energia da vent en il Grischun pretendan princips impegnativs per la planisaziun. Per quest motiv vegn cumplettà il plan directiv chantunal pertutgant il sectur energia da vent ed actualisà il mussavia existent. En moda impegnativa vegnan fixads tranter auter las pretensiuns generalas envers la planisaziun d'implants eroelectrics sco er ils pass decisivs da la procedura. Il lieu da staziunament na vegn betg fixà concretamain – pervia da las consequenzas per gronda part regiunalas d'implants d'energia da vent – en il plan directiv chantunal, mabain en ils plans directivs regiunals.
Il plan directiv chantunal cumplettà vegn ussa suttamess a la confederaziun per l'approvaziun.

Ulteriuras infurmaziuns: Uffizi per il svilup dal territori dal Grischun

Nova professiun federala spezialist(a) en communicaziun d'hotellaria
La professiun instruida enfin ussa en il Grischun e reglamentada sin plaun chantunal "spezialist(a) d'hotel e da gastronomia" vegn substituida tras ina scolaziun reglamentada sin plaun federal. La confederaziun ha l'intenziun da metter en vigur l'ordinaziun davart la furmaziun fundamentala professiunala da la professiun "spezialist(a) en communicaziun d'hotellaria AFQ" per il 1. da schaner 2017. En il Grischun duai la scolaziun vegnir purschida a partir da la stad 2017.
La regenza grischuna è pronta d'incumbensar la scola professiunala d'hotellaria dal Grischun sut l'instituziun responsabla da la Swiss School of Tourism and Hospitality (SSTH) da porscher la nova scolaziun. Envers il chantun ha la SSTH adina manifestà grond interess da pudair intermediar la part scolastica da la nova professiun, grazia ad ina incarica da prestaziun dal chantun.

Revisiun parziala da l'ordinaziun davart la protecziun d'uffants e da creschids (OPUC)
La regenza relascha l'ordinaziun davart la protecziun d'uffants e da creschids (OPUC). Suenter passa trais onns experientscha vegnan optimadas in pau las cumpetenzas e las proceduras.
Il 1. da schaner 2013 è entrada en vigur la revisiun parziala dal cudesch civil svizzer (CCS) concernent la protecziun da creschids, il dretg da persunas ed il dretg d'uffants. Cun questa midada è vegnì revedì fundamentalmain il dretg tutelar ed adattà als fatgs ed a las pretensiuns dad oz. Sin plaun chantunal èn vegnidas realisadas las midadas cun agid d'ina revisiun parziala da la lescha introductiva tar il CCS sco er cun il relasch da differentas ordinaziuns. La novaziun la pli impurtanta en quest connex è stada la furmaziun da 5 autoritads chantunalas per la protecziun d'uffants e da creschids.
Las emprimas experientschas cun il nov dretg da la protecziun d'uffants e da creschids mussan ch'i dat in tschert basegn da far adattaziuns. Cun la revisiun parziala da la OPUC duai per l'ina vegnir formulada pli exactamain la posiziun e la funcziun da la direcziun da la APUC. Per l'autra vegn revedida la regulaziun dals custs, particularmain las disposiziuns concernent ils custs da procedura e da mesiras.

Projects collectivs per la selvicultura
La regenza ha approvà il project collectiv selvicultura 2016 cun custs totals da 23,8 milliuns francs. Il project è vegnì elavurà en collavuraziun cun var 200 proprietaris da guaud publics e privats. Sin totalmain 260 hectaras vegn mantegnì il guaud da protecziun, promovida la diversitad da las spezias e tgirà il guaud giuven. Ultra da quai vegnan fatgs tagls da laina en territoris che n'èn betg bain accessibels. Finanzià vegn quest project tras meds da la confederaziun, dal chantun e dals proprietaris da guaud respectivs.


Gremi: regenza
Funtauna: rg chanzlia chantunala dal Grischun
Neuer Artikel