En sia ultima sesida ha la regenza grischuna prendì posiziun tar in project da consultaziun da la confederaziun. Ultra da quai propona ella al cussegl grond da conceder in credit d'impegn per la restauraziun da la baselgia claustrala Son Martin a Mustér e conceda ina contribuziun chantunala per il project per il svilup regiunal Beverin.
La regenza beneventa la direcziun da las midadas dal register federal dals edifizis e da las abitaziuns
La regenza grischuna prenda posiziun tar la revisiun totala da l'ordinaziun davart il register federal dals edifizis e da las abitaziuns (OREA). Las midadas proponidas han l'intent da definir en moda pli precisa las cumpetenzas e da simplifitgar en general l'utilisaziun da las datas da la OREA.
La regenza grischuna beneventa la direcziun da la revisiun totala. Ultra d'in meglier posiziunament da la OREA e d'ina repartiziun pli clera da las incumbensas e da las cumpetenzas tranter las parts participadas spetga la regenza er in meglierament da la qualitad da las datas. La regenza è però da l'avis ch'i stoppian anc vegnir fatgas urgentamain singulas adattaziuns en il sboz da consultaziun, spezialmain areguard las definiziuns dals edifizis, areguard ils termins ed areguard ils custs. La regenza refusa ch'il chantun e las vischnancas stoppian purtar ils custs da revisiun.
Midada da la calculaziun da la nota d'admissiun en l'emprima classa gimnasiala
La regenza ha approvà la revisiun parziala da l'ordinaziun davart la procedura d'admissiun a las scolas medias. Tenor quella vegn reglada da nov la nota d'admissiun da la 6. classa primara a la 1. classa gimnasiala. Fin ussa han las scolas medias resguardà la media da las notas da tut ils roms da l'attestat da l'emprim semester da la 6. classa primara. Las disposiziuns vertentas na garanteschan actualmain però betg che las scolaras ed ils scolars da tut las classas primaras grischunas vegnan valitads en ils medems roms. Quai po chaschunar ina inegualitad giuridica che sto vegnir evitada. Perquai duain vegnir resguardadas mo las notas da matematica, da l'emprima e da la segunda lingua per calcular la nota d'admissiun. L'ordinaziun revedida entra en vigur ils 15 d'avust 2016.
Credit d'impegn per la restauraziun da la baselgia claustrala Son Martin a Mustér
La regenza ha prendì enconuschientscha dal concept e dals custs da la restauraziun da la baselgia claustrala Son Martin a Mustér. Per la realisaziun propona la regenza al cussegl grond en il rom da la missiva tar il preventiv 2017 da conceder in credit d'impegn dad 1 810 000 francs.
La baselgia claustrala Son Martin a Mustér e cun ella tut l'implant claustral è il stabiliment il pli marcant da la Surselva. L'onn 2017 duain vegnir renovadas parts da la fatschada sco er a partir da l'onn 2018 l'intern da la baselgia. En spezial tar la fatschada datti in basegn d'agir urgent. Parts entiras da la fatschada stattan per crudar giu. En l'intern èn er sa furmadas sfessas marcantas ed igl ha dà ina polluziun che periclitescha l'effectiv istoric. Ultra da las lavurs da restauraziun duain er vegnir fatgas tschertas meglieraziuns tecnicas, uschia per exempel vi dal sistem da stgaudar.
Contribuziun chantunala al project per il svilup regiunal Beverin
Per il project per il svilup regiunal (PSR) Beverin deliberescha la regenza ina contribuziun chantunala da maximalmain 1 560 000 francs. Quella è però liada ad ina cuntraprestaziun da la confederaziun: la confederaziun renconuscha il project sco PSR e deliberescha ina contribuziun federala da maximalmain 1 950 000 francs.
La finamira dal PSR Beverin è quella da mantegnair e da sviluppar vinavant la valurisaziun regiunala en l'agricultura. Cun il project vegn promovida l'elavuraziun regiunala ed i vegnan averts novs chanals da vendita. La promoziun dal mastergn regiunal e da l'agricultura gida a garantir vinavant l'existenza d'ina regiun vitala e productiva.
Augment dal pais maximal permess sin la via da Breil
La regenza ha decidì d'augmentar il pais maximal permess sin la via chantunala da colliaziun tranter Tavanasa e Breil da 18 a da nov 32 tonnas. Suenter la construcziun d'ina nova punt sur il Rain anteriur è tut il traject si a Breil adattà da purtar in pais pli grev.
Gremi: regenza
Funtauna: rg chanzlia chantunala dal Grischun