Navigation

Inhaltsbereich

  • Erste Mitteilung
  • Neuen Beitrag einfügen
Oz ha la regenza decidì da suttametter al cussegl grond per la sessiun da december 2016 ina missiva per ina candidatura dal Grischun per gieus olimpics e paralimpics d'enviern 2026. Sch'il cussegl grond approvescha la candidatura, ha lieu la votaziun dal pievel ils 12 da favrer 2017.

Las organisaziuns da tetg da l'economia grischuna han inoltrà a la regenza il dossier definitiv dal "Concept general per gieus olimpics d'enviern Grischun & partenaris 2026". Sin basa da quest dossier, che sto vegnir sviluppà vinavant, vegn dumandà – en il rom da la missiva al cussegl grond – in credit d'impegn brut da 25 milliuns francs per inoltrar ina candidatura dal Grischun e per manar il process d'annunzia internaziunal. Betg anc clera n'è la participaziun finanziala d'auters partenaris. La grevezza effectiva per il chantun vegn dentant ad esser cleramain pli bassa.

Cun quest pass tegna la regenza quint dal fatg che Swiss olympic ha midà ses urari da candidatura. Da nov decida il cussegl executiv gia mez mars 2017, sch'ina candidatura svizra duai vegnir annunziada tar il comité internaziunal olimpic e cun tge concept che quai duai succeder. La decisiun vegn ratifitgada tras il parlament da sport la fin da mars 2017. La regenza vesa schanzas essenzialas en ina candidatura per gieus olimpics e paralimpics d'enviern 2026, ed ella giuditgescha las schanzas en la procedura naziunala da nominaziun sco intactas. Sch'il resultat da la votaziun dal pievel è positiv, po il Grischun sa participar a la procedura d'annunzia cun ina candidatura acceptada dal suveran. Qua tras è avant maun la legitimaziun politica necessaria, ed ils meds necessaris stattan a disposiziun per manar vinavant il process en moda empermettenta. Quai valitescha la regenza sco ferm argument per il proceder tschernì.

En ina segunda votaziun, che ha previsiblamain lieu l'atun 2018, po il pievel lura decider davart il project definitiv cun tut ils detagls necessaris. Quest project definitiv duai vegnir elavurà vinavant, suenter che la candidatura è vegnida acceptada.

La regenza è conscienta ch'i dovra in effort spezial da tut las parts participadas per realisar gia il favrer 2017 ina votaziun davart la candidatura. Perquai vegn ella a sa drizzar immediatamain a la direcziun dal cussegl grond per garantir che la fatschenta vegnia tractada uschè svelt sco pussaivel. Plinavant vegn ella ad entrar en discussiun cun las partidas politicas, cun las fracziuns dal cussegl grond e cun ulteriurs circuls interessads, per che l'urari proponì vegnia observà e per ch'i vegnia fatga la lavur da persvasiun necessaria en vista a la votaziun dal pievel. Las partenarias da realisaziun impurtantas èn e restan las organisaziuns da tetg da l'economia grischuna.

Cumbain ch'il temp per furmar l'opiniun da la populaziun vegn ad esser relativamain curt, ha la regenza buna speranza che las votantas ed ils votants sa laschian persvader da l'attractivitad e dals effects positivs che resultan d'ina candidatura per gieus olimpics e paralimpics d'enviern 2026 en il Grischun.


Infurmaziuns:
Cusseglier guvernativ dr. Jon Domenic Parolini, schef dal departament d'economia publica e fatgs socials, tel. 081 257 23 01, e-mail Jondomenic.Parolini@dvs.gr.ch


Gremi: regenza
Funtauna: rg chanzlia chantunala
Neuer Artikel