Navigation

Inhaltsbereich

  • Erste Mitteilung
  • Neuen Beitrag einfügen
Projects per il svilup regiunal (PSR) duain promover il svilup da l'agricultura. Ina schanza che na vegn anc betg tratga a niz cumplainamain en il Grischun. Ad ina dieta publica duai perquai vegnir discutà davart il potenzial da tals projects ed a las vischnancas, a las persunas responsablas per il turissem, als parcs natirals ed a l'agricultura duai vegnir mussada la via en quella finamira.

L'onn 2007 ha il parlament federal concludì en il rom da la politica agrara da sustegnair finanzialmain en il futur projects per il svilup regiunal (PSR). Cun il nov instrument da promoziun duess l'agricultura daventar pli cumpetitiva sin il martgà che daventa adina pli dir e pli dinamic. Er en il Grischun èn vegnidas sviluppadas sinaquai bleras ideas da projects. Mo paucas èn però vegnidas sviluppadas vinavant e realisadas. Latiers tutgan il Center d’agricultura a Mustér, il project «100% (bio) Valposchiavo» sco er iniziativas da l'agricultura a Claustra, a Churwalden, en la Val Müstair u en il territori dal parc natiral Beverin.

Trair a niz meglier il potenzial

Ord vista dal chantun vegn il potenzial anc explotà memia pauc, damai che l'agricultura vegn ad esser exponida en il futur anc pli ferm al martgà. Gist per il territori da muntogna munta quai ina gronda sfida. L'instrument dals PSR porscha als manaschis agriculs ed a las regiuns la pussaivladad da meglierar lur cumpetitivitad a lunga vista. D'ina vart pon uschia vegnir valurisadas meglier las resursas natiralas. Da l'autra vart po la valurisaziun dals products agriculs e dals servetschs vegnir augmentada. E la finala vegn augmentada l'effizienza tar la producziun sin basa d'ina collavuraziun sistematica. Ina part impurtanta dals projects èn la colliaziun regiunala e la collavuraziun cun autras branschas sco il mastergn ed il turissem. Cun in PSR po vegnir cuntanschì in effect multiplicativ en ina regiun.

Dieta publica en il Plantahof
Per mussar quest potenzial organisescha l'uffizi d'agricultura e da geoinfurmaziun ils 8 da november 2016 ina dieta publica en il Plantahof a Landquart. I duai vegnir tratg bilantscha da las experientschas da l'emprim decenni cun PSR ed i duai vegnir discutà oravant tut sur da novs concepts en l'agricultura da muntogna. Ina rolla adina pli centrala giogan en quest connex er las vischnancas, las organisaziuns turisticas, ils sviluppaders regiunals u ils parcs natirals, saja quai sco partenaris, sco cuniniziants u sco coordinaturs. Perquai na sa drizza questa dieta betg mo als acturs da l'agricultura, mabain er a quests gremis. Inputs vegnan dads tranter auter dal cusseglier dals chantuns Ruedi Noser, president da la firma da commerzialisaziun "Natürli", da l'econom agrar Gianluca Giuliani e da rapports da la pratica da PSR realisads en il Grischun ed en il chantun Schaffusa.

• Tema: "Projects per il svilup regiunal (PSR): bilantscha e potenzial"
• Mardi, ils 8 da november 2016, da las 9.30 fin las 16.00
• Plantahof, sala dals allevaturs, Landquart

Annunzia fin ils 28 d'october 2016 sur info@alg.gr.ch


Infurmaziuns
:
Daniel Buschauer, manader da l'uffizi d'agricultura e da geoinfurmaziun, tel. 081 257 24 31, e-mail Daniel.Buschauer@alg.gr.ch


Gremi: uffizi d'agricultura e da geoinfurmaziun
Funtauna: rg uffizi d'agricultura e da geoinfurmaziun
Neuer Artikel