Navigaziun principala

Cuntegn da la pagina

Communicaziun da la regenza dals 3 da november 2016

  • Erste Mitteilung
  • Neuen Beitrag einfügen

La regenza ha suttascrit il contract da prestaziuns per l'arena tectonica svizra Sardona, ha concedì ina contribuziun NPR per in project da turissem regiunal ed ha permess plazzas da parcar publicas en la Val Mesauc.

L'arena tectonica svizra Sardona duai daventar pli enconuschenta
La regenza prenda enconuschientscha da la cunvegna da program tranter l'uffizi federal d'ambient ed il chantun Glaruna concernent las finamiras dal program per il patrimoni mundial da l'UNESCO arena tectonica svizra Sardona (ATS) per ils onns 2016 fin 2019. La cunvegna è vegnida suttascritta per garantir la cofinanziaziun da la confederaziun. Sa basond sin quai ha la regenza grischuna suttascrit cun l'instituziun ch'è responsabla per l'ATS in contract da prestaziuns sco er ina cunvegna davart prestaziuns supplementaras per il chantun Grischun per la medema perioda.
La confederaziun conceda al program per ils onns 2016 fin 2019 ina contribuziun da var 1,5 milliuns francs, entant ch'ils chantuns Glaruna e Son Gagl pajan mintgamai 50 000 francs per onn. En il rom da la budgetaziun per l'onn 2016 e da la planisaziun da las finanzas 2017–2019 è la contribuziun dal chantun Grischun a favur da l'ATS vegnida augmentada da fin ussa 50 000 francs sin 150 000 francs per onn. Resalvada resta l'approvaziun dals credits annuals tras il cussegl grond.
Cun augmentar la contribuziun vul la regenza grischuna dar a l'ATS dapli libertad d'agir per projects ed activitads en il chantun Grischun. Sut quest aspect ha l'instituziun ch'è responsabla per l'ATS, che cumpiglia las vischnancas da staziunament, suttamess al chantun Grischun ina proposta per dus projects concrets. In da quels è in project accumpagnant che permetta a l'ATS da sustegnair e da promover ulteriurs terzs projects en il Grischun. Ultra da quai è previs sco project da cooperaziun la participaziun a l'uniun parcs grischuns per sviluppar e per realisar projects cuminaivels en ils secturs da la communicaziun, dal marketing, da la furmaziun u da la pescrutaziun.

-
Vista da Plaun Segnas Sut sin las Dunschalas
©Thomas Kessler Visuals, Flums

Contribuziun da NPR per in liom emoziunal cun il turissem
La regenza ha garantì a la cuminanza d'interess per il turissem en il Grischun (ITG) ina contribuziun NPR per il project "Fascinaziun turissem". Als custs dal project da var 2,9 milliuns francs ha concedì la regenza grischuna totalmain 990 000 francs, però maximalmain 35 pertschient dals custs effectivamain imputabels. Contribuziuns en il rom da la nova politica regiunala da la confederaziun (NPR) vegnan surpigliads mintgamai per la mesadad da la confederaziun e dals chantuns participads, en quest cas pia mintgamai 495 000 francs.
Cun il project "Fascinaziun turissem" prenda la ITG en mira d'augmentar la conscienza publica per l'impurtanza dal turissem. La realisaziun focussescha sin il project parzial "plivalur per las Grischunas ed ils Grischuns". Sur in portal d'internet duain vegnir purschidas prestaziuns exclusivas e specificas per Grischunas e Grischuns. Il portal vegn endrizzà per la stagiun da stad 2017. La ITG s'empermetta da rinforzar cun il project il liom emoziunal da la populaziun indigena cun il turissem.

Ulteriuras infurmaziuns davart la cuminanza d'interess per il turissem en il Grischun

Approvà la planisaziun locala da la vischnanca da Rossa
La regenza ha approvà il plan d'utilisaziun da la vischnanca da Rossa e procurà uschia per las premissas da la planisaziun dal territori per construir plazzas da parcar publicas a l'entrada nordost dad Augio. Avant era previs en il plan general d'avertura atgnamain in auter lieu per ils novs parcadis. La planisaziun tecnica da detagl ha però mussà che quest lieu n'è betg optimal per ils parcadis. Il nov lieu è pli cunvegnent e pli adattà areguard la vischinanza al santeri ed al territori d'abitadi.

-
Novas surfatschas da parcar a l'entrada dal vitg dad Augio
© Comet Photoshopping ScRL/ Dieter Enz


Gremi: regenza
Funtauna: rg chanzlia chantunala dal Grischun

Neuer Artikel