Sin invit da la regenza ha l'ambassadur da la Tschechia, Karel Borůvka, visità oz il chantun Grischun.

L'ambassadur da la Tschechia, Karel Borůvka, è vegnì beneventà oz en la chasa grischa a Cuira dal president da la regenza dr. Christian Rathgeb e dal chancelier dr. Claudio Riesen. L'ambassadur è vegnì accumpagnà dal cusseglier d'ambassada Pavel Bednář. Suenter il barat dals salids uffizials è in gentar cuminaivel stà sin il program.

La regenza grischuna tgira annualmain contacts cun represchentantas e represchentants da stadis esters en Svizra. Quests discurs èn elements impurtants da las relaziuns externas dal chantun. Cun ils stadis vischins e cun pajais che han relaziuns spezialas cun la Svizra e cun il Grischun vegnan savens discutadas dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

Fotografia agiuntada:

L'ambassadur Karel Borůvka (segund da sanestra), accumpagnà dal cusseglier d'ambassada Pavel Bednář, vegn beneventà en la chasa grischa dal president da la regenza dr. Christian Rathgeb (a sanestra) e dal chancelier dr. Claudio Riesen (a dretga).


Gremi: regenza
Funtauna: rg chanzlia chantunala dal Grischun