Il turissem da sanadad daventa adina pli impurtant, en Svizra ma er en ils pajais vischins. Il chantun Grischun vul sa posiziunar en quest martgà creschent. Cun crear purschidas attractivas ed innovativas duain vegnir carmalads giasts da sanadad extrachantunals e da l'exteriur da vegnir en il Grischun. Per quest intent ha la regenza nominà ina gruppa directiva.
La gruppa directiva vegn manada dal deputà Philipp Gunzinger, Scuol. Ella sa cumpona da represchentantas e represchentants dals fatgs da sanadad, dal turissem sco er da l'administraziun. L'incumbensa da la gruppa directiva è tranter auter quella da sviluppar per mauns dal departament da giustia, segirezza e sanadad concepts e strategias per promover prestaziuns da sanadad orientadas a l'export. Plinavant duai ella definir las gruppas che vegnan en dumonda per purschidas dal turissem da sanadad ed identifitgar lur basegns. Sin basa da quai duain alura vegnir skizzadas purschidas specificas per questas gruppas tenor il potenzial da prestaziun dals ospitals e da las clinicas sco er da l'hotellaria dal Grischun.
La gruppa directiva sa cumpona da las suandantas persunas:
- lic. rer. pol. Philipp Gunzinger, deputà, Scuol (direcziun)
- Heinz Dudli, deputà, inschigner da construcziun diplomà SPF/SIA
- Ariane Ehrat, CEO da l'organisaziun turistica Engiadina San Murezzan
- prof. dr. med. Markus Furrer, schefmedi da la chirurgia da l'ospital chantunal dal Grischun
- Susanne Lebrument, commembra da la direcziun da la Somedia
- Josef Müller, directur dals servetschs psichiatrics dal Grischun
- Peder Plaz, Hauser e partenaris SA
- prof. R. Geoff Richards, directur dad AO Research and Development
- dr. med. Adrian Urfer, delegà/CEO da la clinica Gut
- dr. med. Beat Villiger, anteriur manader da l'institut da medischina da sport Tavau
- Martin Vincenz, directur da Grischun vacanzas
- Ernst Wyrsch, president da hotelleriesuisse Grischun
- Eugen Arpagaus, manader da l'uffizi per economia e turissem
- Adrian Dinkelmann, uffizi per economia e turissem
- dr. Rudolf Leuthold, manader da l'uffizi da sanadad
- lic. iur. Gion Claudio Candinas, secretari dal departament
Infurmaziuns:
president da la regenza Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch
Gremi: regenza
Funtauna: rg chanzlia chantunala dal Grischun