La regenza ha prendì posiziun tar la revisiun parziala da la lescha federala da chatscha. Plinavant ha ella spustà la votaziun dal pievel davart l'iniziativa da chatscha ed ha dà glisch verda ad in nov hotel a Savognin.
La SATE Cuira duai daventar ina scola auta spezialisada autonoma
Il chantun Grischun inoltrescha a la confederaziun la dumonda da renconuscher la scola auta da tecnica ed economia (SATE Cuira) sco instituziun che survegn contribuziuns. Quai fa ella en enclegientscha cun ils purtaders da la scola auta spezialisada da la Svizra orientala (SASSO) e cun la resalva che la SATE Cuira vegnia accreditada tras l'agentura svizra per accreditaziun e garanzia da qualitad (aaq).
La SATE Cuira fa actualmain part da la SASSO. Igl è però previs da manar la SATE Cuira en l'avegnir sco scola auta spezialisada autonoma sut la responsabladad exclusiva dal chantun Grischun. Las regenzas dals chantuns Son Gagl e Grischun sustegnan il process da restructuraziun. Il cussegl da scola da la SASSO ha dà ses consentiment che la SATE Cuira sa lascha accreditar e ch'il chantun Grischun po inoltrar al cussegl federal la dumonda da renconuscher la SATE Cuira sco instituziun che survegn contribuziuns.
Per il chantun Grischun è ina scola auta autonoma d'impurtanza strategica. La scolaziun, la perscrutaziun ed ils servetschs da la SATE Cuira èn ina pitga impurtanta per l'ulteriur svilup economic e per il rinforzament dal Grischun sco plazza economica. Cun sia purschida da scolaziun attractiva, cun ils differents projects da perscrutaziun e cun ils servetschs che s'orienteschan a la pratica presta la SATE Cuira ina contribuziun impurtanta en il sectur dal transfer da savida e da tecnologia e gida uschia a rinforzar l'economia publica dal Grischun. Ils ultims onns èsi sa mussà pliras giadas che l'ulteriur svilup da la SATE Cuira vegn retardà tras l'integraziun da la SATE Cuira en la SASSO. Per consequenza vegnan er impedidas stentas da rinforzar l'economia publica dal Grischun. La scola ed il chantun dovran vias da decisiun curtas ed effizientas che tegnan quint da la situaziun geografica e linguistica speziala dal Grischun. Ultra da quai vul la politica chantunala promover l'ulteriur svilup da la SATE Cuira tras la construcziun d'in center da scola auta e rinforzar il Grischun sco lieu da scolas autas per pudair far frunt a la concurrenza naziunala.
Posiziun tar la lescha federala da chatscha
La regenza ha prendì posiziun tar la revisiun parziala da la lescha federala davart la chatscha e la protecziun dals mamifers e dals utschels selvadis (lescha da chatscha). Cun questa revisiun parziala vegn realisada ina moziun ch'il cusseglier dals chantuns Stefan Engler aveva inoltrà cun l'intent ch'ils effectivs da lufs possian vegnir regulads en l'avegnir sut premissas cleramain definidas. Quai vegn beneventà explicitamain da la regenza. La revisiun parziala da la lescha federala da chatscha ha dentant er en reguard general ina impurtanza decisiva per il chantun Grischun cun ses gronds effectivs da selvaschina.
La regenza grischuna renconuscha il fatg che la revisiun da la lescha federala da chatscha va da princip en la dretga direcziun. Betg schliads na vegnan dentant ils problems en il sectur da l'execuziun da la lescha da chatscha.
Problematica per il chantun Grischun è plinavant la renconuschientscha vicendaivla planisada dals examens chantunals da chatscha. La regenza pretenda ch'i vegnia separà cleramain tranter examen da chatscha e dretg d'ir a chatscha. Ils chantuns cun chatscha da patenta ston perquai avair la pussaivladad da restrenscher respectivamain da limitar il dretg da chatscha per chatschadras e chatschaders senza examen chantunal da chatscha.
Plinavant n'è la regenza grischuna betg d'accord ch'ils effectivs da lufs dastgan vegnir regulads mo dals 3 da schaner fin ils 31 da mars. Ella propona a la confederaziun da prevair il temp dal 1. da december fin ils 31 da mars per quest intent. Las experientschas fatgas enfin ussa en il Grischun mussan numnadamain ch'ils lufs sa movan cunzunt il december ed il schaner sco rotschas entiras. Pli tard sa dividan quellas savens en rotschas parzialas. Perquai è il december adattà spezialmain bain per regular las rotschas lufs.
Posiziun da la regenza dal Grischun
Suspendì la votaziun dal pievel davart l'iniziativa da chatschà
La regenza ha suspendì il termin da votaziun dals 21 da matg 2017 per l'iniziativa dal pievel "Per ina chatscha etica che sa cumporta cun la natira". Ils 17 d'october 2016 aveva il cussegl grond declerà l'iniziativa chantunala per parzialmain nunvalaivla. Cunter quai han dentant trais persunas dal comité d'iniziativa sco er in'ulteriura persuna fatg recurs tar la dretgira administrativa dal Grischun. Perquai ch'ina sentenzia cun vigur legala na dastgass probablamain anc betg esser avant maun fin ils 21 da matg 2017, daventa quest termin da votaziun obsolet. Actualmain na sa laschi betg stimar, cura che la procedura vegn ad esser terminada. Quai dependa tranter auter, sch'i vegn fatg recurs tar il tribunal federal cunter la sentenzia da la dretgira administrativa. In nov termin da votaziun po perquai vegnir fixà da la regenza pir, suenter che la procedura giudiziala è terminada definitivamain.
Sustegn finanzial per l'Arche Nova a Landquart
La regenza ha approvà la dumonda da subvenziun per l'engrondiment e la midada da l'Arche Nova a Landquart, inoltrada dals servetschs psichiatrics dal Grischun (SPGR). Il chantun ha garantì ina contribuziun da maximalmain 1,52 milliuns francs.
Cun la renovaziun e l'engrondiment dal center da dimora e d'occupaziun a Landquart vulan ils SPGR centralisar lur plazzas d'abitar. Per pudair satisfar a las dumondas per plazzas or dal territori dals Tschintg Vitgs, da Maiavilla e dal Partenz davant vulan ils SPGR engrondir l'Arche Nova a Landquart cun duas plazzas d'abitar protegidas e cun quatter plazzas da structuras dal di protegidas. La surfatscha utilisada engrondida a Landquart pussibilitescha da schliar la gruppa d'abitar a Schiers suenter la renovaziun e d'integrar quella en l'edifizi central Arche Nova a Landquart. Actualmain è l'Arche Nova repartida sin quatter lieus a Landquart, Vaz sut, Igis e Schiers.
Arche Nova a Landquart
Glisch verda per in nov hotel a Savognin
La regenza ha approvà la revisiun parziala da la planisaziun locala da la vischnanca da Surses dals 30 da november 2015. Qua tras vegnan stgaffidas las premissas da la planisaziun d'utilisaziun per construir in hotel en il territori "Grava" a Savognin. Per quest intent vegnan transferidas duas parcellas da la zona da parcadi ad ina zona d'hotel. Betg approvads na vegnan dentant ils secturs da la nova zona d'hotel ch'èn surpostads da la zona da privel 1 sper l'aual dal vitg, il Schletg.
© Comet Photoshopping GmbH / Dieter Enz
Dapli segirezza per la via da Brambrüesch a Malix
La regenza ha approvà cun cundiziuns e cun permissiuns spezialas il project d'exposiziun per la correcziun d'in traject d'ina lunghezza da circa 1,6 kilometers da la via da Brambrüesch a Malix. La via chantunala da colliaziun è per part fitg stretga e nunsurvesaivla e na correspunda betg pli a las pretensiuns dal volumen da traffic d'ozendi. Quest project da via cumpiglia la renovaziun da la surstructura da la via, in schlargiament general da la via a 4,2 meters sco er ina colliaziun survesaivla da la via da Brambrüesch cun la via dal Güglia. Ils custs totals importan 8,7 milliuns francs. Da questa summa van circa 500 000 francs a quint da la vischnanca da Churwalden, perquai ch'ella realisescha in passape sin il traject entaifer il vitg da Malix.
Augment dal pais maximal sin la via da Serneus a Serneus
La regenza ha approvà in augment dal pais maximal permess sin la via da Serneus en la vischnanca da Claustra-Serneus. Pertutgà è il traject d'ina lunghezza da 114 meters en il sectur da la punt sur la Landquart. Cur che la via è renovada, po il pais maximal permess vegnir auzà dad actualmain 32 tonnas sin 40 tonnas. Sin quest traject vegn er abolì il scumond per camiuns cun chars annexs.
Gremi: regenza
Funtauna: rg chanzlia chantunala dal Grischun