La regenza ha approvà la realisaziun da novas directivas per calcular l'agid social, ha prendì posiziun davart la cuntraproposta tar l'iniziativa per il velo ed ha concedì contribuziuns or dal fond da sport.
La calculaziun da l'agid social vegn reglada pli detagliadamain
La regenza ha prendì enconuschientscha da la revisiun da las directivas per la concepziun e la calculaziun da l'agid social da la COSAS ed ha approvà la realisaziun per il 1. da schaner 2017. La conferenza da las directuras e dals directurs chantunals dals affars socials ha restructurà differents secturs e precisà il cuntegn da questas uschenumnadas directivas da la COSAS.
Las directivas adattadas permettan per exempel da differenziar pli cleramain tranter l'agid social regular e l'agid d'urgenza per persunas che n'han betg il dretg da restar en Svizra. En quest connex vegni fixà che l'agid d'urgenza vegn pajà a persunas che n'han naginas perspectivas da restar e da s'integrar en la societad svizra.
Plinavant fixeschan las directivas da la COSAS che persunas che survegnan agid social duain viver en abitaziuns favuraivlas, sche necessari cun restricziuns areguard las relaziuns da plazza ed areguard il standard da l'abitaziun.
Da nov vegn reglada pli precis er la cumpatibilitad da la professiun cun la famiglia. Uschia duai la reintegraziun professiunala da las dunnas, suenter ch'ellas han survegnì in uffant, vegnir planisada uschè baud sco pussaivel. Il pli tard cur che l'uffant ha cumplenì l'emprim onn da vita duai la dunna pratitgar in'activitad da gudogn u sa participar ad ina mesira d'integraziun.
Ina survista da tut las directivas da la COSAS
Posiziun tar la cuntraproposta dal cussegl federal tar l'iniziativa per il velo
La regenza ha prendì posiziun tar la cuntraproposta dal cussegl federal tar l'iniziativa federala dal pievel "Per la promoziun da las vias da velo e da las vias e sendas da viandar (iniziativa per il velo)". Il cussegl federal sustegna l'idea da tractar il traffic da velo tuttina sco il traffic da peduns ed il viandar en la politica da traffic. El refusa però quellas pretensiuns da l'iniziativa che surpassan simplas cumplettaziuns da l'artitgel constituziunal actual. Per quest intent ha el mess en discussiun ina cuntraproposta directa.
La regenza grischuna s'exprima per ina cuntraproposta concisa tar l'iniziativa per il velo e
sustegna da princip las explicaziuns da la conferenza svizra dals directurs da construcziun, da planisaziun e da protecziun da l'ambient (CCPA) dals 29 da november 2016. Sulettamain areguard la differenziaziun tranter il traffic da mintgadi ed il traffic da temp liber è il chantun Grischun da l'opiniun ch'ina tala sutdivisiun fiss raschunaivla, analogamain a las vias e sendas da viandar. Sch'i duess vegnir duvrada en la constituziun mo pli la noziun "raits da vias da velo" sco proponì da la CCPA, pretenda il Grischun da differenziar sin stgalim da la lescha tranter il traffic da mintgadi ed il traffic da temp liber. Per il Grischun sco chantun da turissem è ina tala differenziaziun numnadamain da fitg gronda impurtanza.
Posiziun da la CCPA dals 29 da november 2016
L'En a Bever ed a La Punt-Chamues-ch vegn revitalisà
Il project per revitalisar las zonas umidas da l'En a Bever ed a La Punt-Chamues-ch vegn approvà da la regenza cun intginas cundiziuns e permissiuns. Eventualmain ston anc vegnir concretisadas ed approvadas mesiras ch'èn necessarias per administrar la gera e per segirar il letg dal flum. La regenza conceda ina contribuziun chantunala da maximalmain 1,8 milliuns francs cun resalva da la garanzia da contribuziun da la confederaziun.
Il project prevesa d'extender l'En chanalisà sin ina lunghezza da circa 1,7 kilometers. Per quest intent duai vegnir spustà il rempar da la riva dretga per circa 70 meters vers la terra. Il spustament dal rempar da la riva permetta da schlargiar il letg dal flum da 20 a maximalmain 90 meters. Il curs d'aua survegn uschia dapli dinamica, quai che promova il svilup da biotops multifars ed ecologicamain prezius en las zonas umidas. Plinavant vegn segirà en in corridor il sistem d'auas internas existent che accumpogna il flum e che passa per lung dal nov rempar da la riva. Questas auas internas reguleschan il curs da l'aua sutterrana sut la terra ed impedeschan uschia che l'aua curra en las surfatschas da terren cunfinantas che vegnan utilisadas da l'agricultura. Las lavurs da construcziun cumenzan l'onn 2017 e duran probablamain 3 onns.
Contribuziuns or dal fond da sport
La regenza ha garantì contribuziuns pauschalas or dal fond da sport a las commembras ed als commembers da la federaziun da tetg dal sport grischun. A las 43 federaziuns da sport ed organisaziuns vegn concedida ina summa totala dad 1 milliun francs.
Cun daners dal fond da sport vegn sustegnì il center da trenament per passlung (center naziunal da trenament, CNT) a Tavau. Per installar il nov center da passlung survegn la fundaziun per sport da prestaziun a Tavau ina contribuziun maximala da var 67 000 francs.
Plinavant sustegna la regenza l'organisaziun Special Olympics Switzerland cun ina contribuziun da 50 000 francs ch'è liada ad in intent specific. Special Olympics Switzerland vul promover cun quella il sport per umans cun impediments spiertals en il chantun Grischun e stgaffir in post da coordinaziun correspundent. L'incumbensa principala è quella d'installar ina purschida da sport per uffants e giuvenils tranter 8 e 20 onns, ch'i na deva praticamain betg fin ussa. Il project duai vegnir realisà en collavuraziun cun graubündenSPORT.
Center da passlung CNT Tavau (a sanestra) e Special Olympics Switzerland (a dretga)
La via da Schlans a Trun daventa pli segira
La regenza ha approvà il project d'exposiziun per la correcziun da la via da Schlans cun intginas permissiuns spezialas e cundiziuns. La via chantunala da colliaziun dat access a la fracziun Schlans da la vischnanca da Trun. La via na correspunda betg pli als basegns actuals ed a las pretensiuns da segirezza modernas. La correcziun da la via planisada cumpiglia la renovaziun, il schlargiament ed il rinforzament da la via sco er l'augment da la segirezza dal traffic. La via vegn schlargiada a 4,2 meters e la punt da la Val Sinzera a 7 meters. Ultra da quai vegnan renovads la surstructura, ils mirs da sustegn sco er l'allontanament da l'aua da la via.
Gremi: regenza
Funtauna: rg chanzlia chantunala dal Grischun