Far sport en il territori alpin – questa fin d'emna èn sa scuntrads passa 100 giuvenils da 7 regiuns da la ARGE ALP per la cursa da skis alpin a Tavau. Impressiuns da la concurrenza survegnis Vus en il nov film da la chanzlia chantunala dal Grischun.
Las cursas da skis da la cuminanza da lavur da las regiuns alpinas (ARGE ALP) èn concurrenzas en las disciplinas olimpicas slalom e slalom gigant e vegnan organisadas tenor las reglas da la federaziun internaziunala da skis. Quest onn han las cursas da skis alpin gì lieu a Tavau. 109 sportistas e sportists han cumbattì la sonda e la dumengia, ils 10/11 da december, per la victoria. La classificaziun dals pajais ha gudagnà la Baviera. Il Grischun ha cuntanschì la terza plazza.
ARGE ALP Sport – in project da success
La cursa da skis a Tavau ha gì lieu en il rom dal project "ARGE ALP Sport" che vegn manà dal Grischun. Mintga onn vegnan organisadas occurrenzas en il territori da la ARGE ALP en las suandantas disciplinas da sport:
- patinadi artistic
- ballape / ballape per umans cun impediments
- tir da sport
- atletica leva
- cursa d'orientaziun
- raiver sportiv
- ski alpin
- hockey sin glatsch
Ils gieus da la ARGE ALP han en media 1710 participantas e participants per onn. Qua tras èn els ina da las pitgas las pli impurtantas da la collavuraziun internaziunala entaifer la ARGE ALP. Las occurrenzas da sport han ina gronda impurtanza en las differentas federaziuns naziunalas da sport e tutgan en intginas disciplinas da sport schizunt tar ils puncts culminants da la stagiun.
En la cuminanza da lavur da las regiuns alpinas (ARGE ALP) collavuran ils suandants stadis federativs e chantuns sco er las provinzas dals quatter pajais Germania, Italia, Austria e Svizra cun ina populaziun totala da ca. 26 milliuns umans: Baviera, Grischun, Lumbardia, Salzburg, Son Gagl, Tessin, Tirol, Tirol dal sid, Trentino e Vorarlberg.
Infurmaziuns:
Thierry Jeanneret, manader da la partiziun "sport", uffizi per la scola populara ed il sport, tel. 081 257 27 55, e-mail
Thierry.Jeanneret@avs.gr.ch
Gremi: uffizi per la scola populara ed il sport
Funtauna: rg uffizi per la scola populara ed il sport