Zum Seiteninhalt

Communicaziun da la regenza dals 2 da favrer 2017

  • Erste Mitteilung
  • Neuen Beitrag einfügen
La regenza ha prendì posiziun tar duas consultaziuns da cumissiuns parlamentaras ed ha approvà in project cunter privels da la natira a Selva.

Senioras e seniors che guidan in auto duain ir pli tard tar il medi da confidenza
La regenza ha prendì posiziun tar il spustament da la limita da vegliadetgna per la visita da controlla periodica d'automobilistas e d'automobilists seniors tar il medi da confidenza. La consultaziun da la cumissiun da traffic dal cussegl naziunal tracta ina midada da la lescha davart il traffic sin via. Questa midada prevesa che las titularas ed ils titulars d'in permiss da manischar da las categorias betg professiunalas ston far ina visita medicala da traffic mintga dus onns pir a partir dal 75. onn da vegliadetgna e betg sco ussa a partir dal 70. onn da vegliadetgna.
La regenza beneventa la proposta da la cumissiun d'auzar la limita da vegliadetgna. Ella è da l'avis che visitas da controlla augmentian senz'auter la segirezza en il traffic sin via. Uschenavant che quai è enconuschent n'exista però fin oz nagina motivaziun cumprovada scientificamain per ina limita da vegliadetgna. Cun auzar la limita da vegliadetgna pon vegnir reducids la lavur ed ils custs tant per las autoritads sco er per las persunas pertutgadas senza reducir la segirezza dal traffic.
Per augmentar la segirezza en il traffic sin via èsi bler pli impurtant da registrar e d'annunziar en moda consequenta e tempriva las persunas che han problems cun la sanadad ch'èn relevants or da l'optica da la medischina da traffic, e quai independentamain da la vegliadetgna.

La regenza refusa la midada dal cudesch penal
La regenza ha prendì posiziun tar la modificaziun da l'artitgel 53 dal cudesch penal svizzer. Quest artitgel prevesa la liberaziun dal chasti, sch'il delinquent presta ina reparaziun. La cumissiun per dumondas giuridicas dal cussegl naziunal propona ussa in'applicaziun pli severa da la disposiziun. Per l'ina duai vegnir sbassada la limita maximala vertenta da dus onns chasti da detenziun cundiziunà. En quest connex metta la cumissiun en discussiun duas variantas. Per l'autra duai il delinquent stuair admetter danovamain ils fatgs.
La regenza refusa ina midada. Da pretender ch'il delinquent admettia danovamain il malfatg, chaschunass differents problems pratics. Savens vegnian numnadamain inoltradas denunzias penalas per cuntanscher che la persuna denunziada renconuschia pretensiuns da dretg civil. Betg da rar dettia silsuenter in'enclegientscha en furma d'in cumpromiss tranter la persuna denunzianta e la persuna denunziada. La conclusiun d'ina tala enclegientscha vegniss però impedida, sche l'inculpà stuess admetter ils fatgs.
Sche la cumissiun tegness vi da la premissa da l'admissiun dal malfatg, preferescha la regenza la varianta, tenor la quala ina reparaziun duai esser pussaivla mo pli, sch'igl è previs in chasti da detenziun fin ad in onn, in chasti pecuniar cundiziunà u ina multa. Cun la segunda varianta vegniss sbassà anc pli fitg il cunfin maximal a cas d'in chasti pecuniar cundiziunà u d'ina multa.

Il rempar da lavinas a Selva vegn renovà
La regenza ha approvà il project "Renovaziun dal rempar da lavinas Scharinas" e garantì per quest intent ina contribuziun chantunala da var 1,5 milliuns francs. Per incumbensa da la vischnanca da Tujetsch ha l'uffizi da guaud e privels da la natira elavurà in project per reducir il privel da lavinas en il territori Scharinas sur la fracziun Selva.
En quest territori da privel è vegnì construì in rempar da lavinas gia mez dals onns 1950 che duai proteger ultra da la Viafier Matterhorn-Gottard er la via chantunala e la fracziun Selva. Gia dapi in temp pli lung èn vegnids constatads – en il rom da las inspecziuns annualas – donns vi da las construcziuns da betun dal rempar. Ils ultims onns èn quests donns s'augmentads uschè fitg, che questas construcziuns da betun ston vegnir remplazzadas ussa. Per che las vias da traffic ed il territori d'abitadi restian protegids er vinavant cunter lavinas, vegn la zona da privel segirada cun totalmain 360 m rempars d'atschal e 404 m rastels da naiv or da lain.

-

-


Gremi: regenza
Funtauna: rg chanzlia chantunala dal Grischun
Neuer Artikel