Zum Seiteninhalt

Communicaziun da la regenza dals 2 da mars 2017

  • Erste Mitteilung
  • Neuen Beitrag einfügen
La regenza ha approvà la revisiun parziala da set ordinaziuns da chatscha. Ultra da quai ha ella garantì la finanziaziun a l'uniun Casa Depuoz ed a la fundaziun "Gott hilft" per la collocaziun e l'assistenza da requirentas e requirents d'asil minorens betg accumpagnads.

La regenza pretenda da la confederaziun decisiuns sveltas concernent la problematica dal luf
En ina brev a la confederaziun pretenda la regenza grischuna mesiras urgentas ed efficazias per pudair far frunt al svilup nungiavischà en la convivenza cun il luf. La populaziun dal luf crescha fermamain en il chantun Grischun ed ils lufs mazzan adina puspè animals da niz. Gia l'onn 2016 n'èn vegnids constatads betg main che 55 animals da niz stgarpads. Il schaner ed il favrer 2017 hai dà in'ulteriura escalaziun cun quai che anc ina giada 30 animals èn vegnids stgarpads da lufs en vischinanza directa da stallas ed entaifer saivs da pastgira. Quests ultims cas èn capitads en quatter differentas regiuns dal chantun, numnadamain en Bregaglia, en il Mesauc, en la Surselva ed a Mastrils. La regenza è persvadida che l'indulgenza e l'acceptanza per il luf van a perder tar la populaziun e tar l'agricultura dal Grischun, sch'i na vegnan betg stgaffidas immediatamain las basas legalas necessarias sin plaun federal per pudair impedir cun mesiras pli severas ch'il cumportament dal luf sa midia en moda negativa. Perquai pretenda ella che la lescha federala da chatscha vegnia revedida svelt, per che lufs che sa cumportan en moda negativa e che chaschunan donns possian vegnir sajettads svelt.

Novas disposiziuns per la chatscha e la pestga en il Grischun
La regenza ha approvà la revisiun parziala da set ordinaziuns da chatscha sco er la revisiun parziala da las taxas per la patenta da pestga. Per gronda part vegnan exequidas tras quai las midadas ch'èn daventadas necessarias pervia da la revisiun parziala da la lescha chantunala da chatscha ch'entra en vigur il 1. da matg 2017.
Ina midada essenziala pertutga las taxas per la patenta da la chatscha auta per chatschadras e chatschaders d'utrò. Las taxas vegnan augmentadas a norma da la missiva tar la revisiun parziala da la lescha chantunala da chatscha. In'ulteriura adattaziun da las taxas per las patentas da chatscha e da pestga concerna ultra da quai la consegna da patentas d'onur. La consegna vegn simplifitgada en il futur cun quai ch'il criteri dal 70. onn da vegliadetgna cumplenì croda davent.
In'ulteriura nova disposiziun fixescha che l'obligaziun da tir per la chatscha sto esser ademplida fin cur che la chatscha sin capricorns cumenza il 1. d'october.

Garanzia da deficit per l'uniun Casa Depuoz e per la fundaziun "Gott hilft"
La regenza ha approvà ina cumplettaziun da l'incarica da prestaziun per la collocaziun e l'assistenza da fugitivas e fugitivs minorens betg accumpagnads tras l'uniun Casa Depuoz a Trun e tras la fundaziun "Gott hilft" a Zizers. La regenza garantescha la finanziaziun d'ina occupaziun da 95 pertschient fin ils 31 da december 2019.
Ina gronda part da las requirentas e dals requirents d'asil minorens betg accumpagnads è vegnida admessa mo provisoricamain l'onn 2016. Per questas persunas minorennas betg accumpagnadas che han in'admissiun provisorica resta vinavant responsabel il chantun. Las plazzas en las gruppas d'abitar assistidas da la fundaziun "Gott hilft" e da l'uniun Casa Depuoz che vegnan finanziadas da las vischnancas restan nunoccupadas. Pervia da que¬stas plazzas vacantas han las duas purschidras per part fatg deficits. Per che las duas purschidras mantegnian lur incarica da prestaziun èsi necessari da garantir la finanziaziun. Cun ina cumplettaziun da l'incarica da prestaziun fin maximalmain ils 31 da december 2019 duai vegnir garantì che las furnituras da prestaziun èn segiradas cunter in eventual deficit. Attribuziuns e decisiuns davart il dretg da restar pon succeder da tut temp, uschia che las plazzas da la fundaziun "Gott hilft" e da l'uniun Casa Depuoz vegnan duvradas svelt. Sche las plazzas èn percunter nunoccupadas per in temp pli lung e sche la vista ch'ellas vegnian duvradas n'è betg pli avant maun, vegn l'incarica da prestaziun desditga en enclegientscha vicendaivla.

Contribuziun per la punt tranter Cuira e Haldenstein
La regenza ha approvà il project per construir ina punt per peduns e per velos tranter Cuira e Haldenstein. Plinavant ha la regenza concedì ina contribuziun chantunala da maximalmain 740 000 francs.
La nova punt duai manar sur il Rain tranter Ausserfeld Pardisla a Haldenstein e la Untere Au a Cuira. Uschia po vegnir messa a disposiziun ina colliaziun directa e segira cunzunt a las persunas che penduleschan per motivs da la professiun. Cun las lavurs da construcziun duai vegnir cumenzà il mars 2017.

-
©La citad da Cuira

Midadas da zona neutralas en reguard a la surfatscha en la vischnanca da Vaz
La regenza ha approvà ina revisiun parziala da la planisaziun locala da la vischnanca da Vaz dals 25 da settember 2016. Dal plan d'utilisaziun approvà èn pertutgads en tut trais territoris.
Pervia dal basegn da spazi d'abitar per indigens ha la vischnanca concludì d'engrondir la zona dal vitg a Valbella per var 940 meters quadrat en il territori surbajegià per gronda part e da cumpensar quai cun ina dezonaziun.
Ultra da quai vegnan transferidas a Zorten trais parcellas da la zona per edifizis e per stabiliments publics en la zona dal vitg. Uschia pon persunas privatas duvrar u cumprar l'anteriura chasa communala, l'anteriura "Casa son Duno" e l'anteriura chasa-pravenda da la plaiv catolica. Questas midadas da zona èn munidas cun in quota d'emprimas abitaziuns da 33 pertschient.
Il terz territori pertutga la zona da privel "Penasch seura" a Lai. Là è la situaziun da privel vegnida actualisada da la vischnanca l'onn 2012 e classifitgada en quest connex per part pli auta. Tenor la pratica dal chantun na dastgan esser definidas naginas zonas da construcziun en territoris che han ina gronda periclitaziun. La surfatscha da questa dezonaziun cumpensescha l'enzonaziun a Valbella. Las zonas da construcziun pertutgadas èn perquai vegnidas transferidas en zonas da l'ulteriur territori communal.

-
Ils trais anteriurs edifizis publics dastgan ussa vegnir cumprads u duvrads da persunas privatas.
©Comet Photoshopping ScRL/ Dieter Enz

Fotografia Valbella
Fotografia Lai

Il rempar da la Val Schais en Val Müstair vegn sanà
La regenza ha approvà il project per sanar il rempar da la Val Schais en Val Müstair cun intginas cundiziuns sco er cun las permissiuns spezialas. La confederaziun ed il chantun sa participeschan a la finanziaziun cun contribuziuns per la correcziun dals curs d'aua. La contribuziun federala importa 358 750 francs e la contribuziun chantunala 205 000 francs. Supplementarmain sa participescha il chantun cun ina contribuziun per la construcziun da vias da 153 750 francs.
Tras la Val Schais curra in torrent che po chaschunar bovas e che periclitescha – ensemen cun la Muranzina – il territori dal vitg da Sta. Maria cun aua gronda. Il curs natiral da l'aual da la Val Schais è gia vegnì svià en direcziun nordvest. Quest sviament dal curs da l'aual è sa cumprovà da princip. Il chanal da sviament artifizial è en il fratemp vegnì donnegià da las bovas ch'èn adina puspè vegnidas giu. Perquai ha la vischnanca da Val Müstair l'intenziun da sanar quest rempar.

-


Gremi: regenza
Funtauna: rg chanzlia chantunala dal Grischun
Neuer Artikel