Zum Seiteninhalt

Communicaziun da la regenza dals 16 da mars 2017

  • Erste Mitteilung
  • Neuen Beitrag einfügen
La regenza ha dà l'incumbensa d'elavurar in plan da mesiras per catastrofas e situaziuns d'urgenza. Plinavant ha ella concludì da metter en vigur la lescha davart la protecziun cunter incendis.

Planisaziun da mesiras per catastrofas e situaziuns d'urgenza
L'onn 2013 ha la regenza incumbensà l'uffizi da militar e da protecziun civila d'elavurar ina planisaziun da mesiras sin basa da las ristgas en il sectur da catastrofas e da situaziuns d'urgenza per il chantun Grischun. Per accumpagnar e per reglar las lavurs correspundentas ha ella nominà ina giunta directiva che sa cumpona dal schef dal departament da giustia, segirezza e sanadad, dals manaders da l'uffizi da guaud e privels da la natira, da l'uffizi per la natira e l'ambient e da l'uffizi da militar e da protecziun civila sco er dal secretari dal departament cumpetent.
En in'emprima fasa dal project è in vast spectrum da periclitaziuns natiralas, socialas e tecnicas vegnì analisà areguard las ristgas per il chantun. En il center da la segunda fasa è stà il giudicament da la situaziun actuala da la protecziun da la populaziun dal Grischun. L'attenziun principala è vegnida dada en quest connex a las interfatschas existentas tranter las differentas organisaziuns ed incumbensas. Uschia dispona il chantun per l'emprima giada d'ina survista generala sistematica e transparenta davart la situaziun da periclitaziun.
En la proxima fasa, la terza fasa, duai vegnir planisada la realisaziun da las mesiras per eliminar e per reducir las ristgas identifitgadas. Perquai vegn la giunta directiva incumbensada da la regenza da la suttametter fin la fin da settember 2017 in plan da mesiras correspundent.

La furmaziun supplementara per pedagogia curativa da scola cuntinuescha

La regenza ha incumbensà la scola auta da pedagogia dal Grischun (SAPGR) d'organisar en collavuraziun cun la scola auta interchantunala da pedagogia curativa a Turitg (SAPC) in ciclus da scolaziun en pedagogia curativa da scola. Cun questa incumbensa vegn manada vinavant la purschida da furmaziun supplementara gia existenta a partir da l'atun 2018 ed opziunalmain a partir da l'atun 2020.
Per pudair scolar er persunas d'instrucziun dal Grischun talian duai la SAPGR ultra da quai realisar moduls da scolaziun correspundents, e quai en collavuraziun cun la Scuola universitaria professionale della Svizzera italiana/Dipartimento formazione e apprendimento (SUPSI/DFA). Ils custs totals per il curs 2018‑2020 inclusiv ils custs per il studi per studentas e students da lingua taliana importan maximalmain 1 503 244 francs. Per pudair cuntinuar cun la purschida è necessaria l'approvaziun dal preventiv tras il cussegl grond.

La lescha davart la protecziun cunter incendis vegn messa en vigur
La lescha davart la protecziun preventiva cunter incendis ed ils fatgs da pumpiers en il chantun Grischun dals 19 d'october 2016 vegn messa en vigur retroactivamain per il 1. da favrer 2017. Ultra da quai vegn relaschada l'ordinaziun tar la lescha davart la protecziun cunter incendis.
En la nova lescha davart la protecziun cunter incendis vegnan reunidas differentas disposiziuns davart la polizia da fieu e davart ils pumpiers ch'èn regladas oz en differents relaschs. En quest connex vegnan regladas pli cleramain las cumpetenzas da las vischnancas e dal chantun respectivamain da l'assicuranza d'edifizis. Da nov è la realisaziun d'occurrenzas cun periclitaziun speziala da persunas, d'animals, da chaussas u da l'ambient suttamessa a l'obligaziun da dumandar ina permissiun da la vischnanca.


Gremi: regenza
Funtauna: rg chanzlia chantunala dal Grischun
Neuer Artikel