4 da 10 studentas e students dals roms matematica, informatica, scienzas natiralas e tecnica bandunan il chantun Grischun suenter ch'ellas ed els han fatg lur diplom universitar. Quai resulta d'in studi da l'uffizi federal da statistica. Cun l'occurrenza da "trampolin" vul l'uffizi per economia e turissem cumbatter cunter questa tendenza.

Glindesdi, ils 10 d'avrigl 2017, s'inscuntran studentas e students da differentas scolas autas e patrunas e patruns dal chantun Grischun gia per la 11. giada. En il center da l'occurrenza da "trampolin" stat la lavur cuminaivla en lavuratoris che vegnan realisads directamain tar las interpresas. En quest connex preschentan interpresas regiunalas a las studentas ed als students ina sfida actuala da lur differents champs da lavur. En in segund pass vegnan elavuradas cuminaivlamain propostas da soluziun innovativas. Las studentas ed ils students pon uschia dar in sguard unic davos las culissas da las interpresas. A chaschun da l'apero da talent che ha lieu suenter l'occurrenza, pon las studentas ed ils students s'infurmar davart lur perspectivas da carriera e stabilir contacts cun patrunas e patruns potenzials.

Organisaziun cun ina vasta basa
L'uffizi per economia e turissem, l'uffizi per la furmaziun media-superiura, la SATE Cuira e la Graduate School dal Grischun èn ils incumbensaders da l'occurrenza da "trampolin". La sponsura principala è dapi il cumenzament la banca chantunala grischuna.

Las suandantas interpresas sa preschentan a l'occurrenza da "trampolin" GR:

• 08EINS AG
• Center d'innovaziun INNOZET
• CSEM Landquart
• EMS-CHEMIE AG
• Graduate School dal Grischun
• Banca chantunala grischuna
• GRITEC AG
• Hamilton Bonaduz AG
• Landqart AG
• PwC
• TRUMPF Grüsch AG
• VZ VermögensZentrum AG
• WITTENSTEIN AG

Ins po anc s'annunziar
L'occurrenza da "trampolin" en il Grischun è ina da totalmain otg occurrenzas da "trampolin" en Svizra ed ha lieu glindesdi, ils 10 d'avrigl 2017. Studentas e students interessads pon anc s'annunziar per l'occurrenza da "trampolin" fin dumengia, ils 26 da mars 2017.

Ulteriuras infurmaziuns ed annunzia sut www.sprungbrettevent.gr.ch  

Infurmaziun per collavuraturas e collavuraturs da las medias
Nus As envidain d'accumpagnar l'occurrenza cun Vossa media. L'uffizi per economia e turissem As sustegna gugent a purtretar ina studenta u in student ubain ina interpresa che sa participescha a l'occurrenza da "trampolin".


Infurmaziuns:
Paolo Giorgetta, svilup da l'industria locala, uffizi per economia e turissem, tel. 081 257 23 75, e-mail: Paolo.Giorgetta@awt.gr.ch  


Gremi: uffizi per economia e turissem
Funtauna: rg uffizi per economia e turissem