Tranter ils 21 da schaner ed ils 8 da favrer 2017 ha in luf stgarpà passa 40 nursas en Bregaglia, en la Leventina (chantun Tessin) ed en la Val Mesauc. En trais cas, numnadamain a Stampa, a Faido ed a Cama, ha il medem luf M75 stgarpà las nursas. El ha pudì vegnir identifitgà a maun d'analisas geneticas.

Sa basond sin l'art. 9^bis da l'ordinaziun federala da chatscha po vegnir concedida ina permissiun da sajettar singuls lufs che fan donns considerabels tar animals da niz. D'in donn considerabel tar animals da niz chaschunà tras in singul luf sa tracti tranter auter, sch'i vegnan mazzads en ses territori da chatscha – malgrà mesiras per proteger la muntanera – almain 25 animals da niz entaifer in mais. Sch'ils donns resultan sin il territori da dus u da plirs chantuns, ston ils chantuns pertutgads giuditgar quels en moda coordinada. La permissiun da sajettar in luf sto servir a la prevenziun cunter ulteriurs donns vi d'animals da niz.

Ils dus chantuns Tessin e Grischun han relaschà en enclegientscha vicendaivla ina disposiziun per sajettar il luf M75. Quella è limitada a 60 dis.

La difficultad che sa mussa en connex cun la schluppettada planisada dal luf M75 è il cumportament tipic d'in luf betg staziunar, quai vul dir la dischlocaziun frequenta e svelta sur distanzas pli grondas. Perquai èsi senz'auter pussaivel ch'il luf M75 è er responsabel per las set nursas ch'èn vegnidas stgarpadas ils 18 da favrer 2017 a Trun. Il proceder sistematic a Trun è numnadamain identic cun quel a Cama ed a Faido. En il chantun Grischun vegn perquai integrada – ultra da las duas vals dal sid Mesauc e Bregaglia – er la Surselva en il perimeter da prelevaziun.


Infurmaziuns:
- cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch
- dr. Georg Brosi, manader da l'uffizi da chatscha e pestga dal Grischun, tel. 081 257 38 92, e-mail Georg.Brosi@ajf.gr.ch


Gremi: uffizi da chatscha e pestga dal Grischun
Funtauna: rg uffizi da chatscha e pestga dal Grischun