L'ambassadur chinais sin visita tar la regenza grischuna

Sin invit da la regenza ha l'ambassadur chinais, GENG Wenbing, visità oz il chantun Grischun.

L'ambassadur da la Republica Populara da la China GENG Wenbing è vegnì beneventà oz en la chasa grischa a Cuira da la presidenta da la regenza Barbara Janom Steiner e dal chancelier Claudio Riesen. L'ambassadur è vegnì accumpagnà da la cussegliera d'ambassada XI Ru, dal schef da l'administraziun LIU Daosheng, da l'emprima secretaria da la partiziun "economia e commerzi" YIN Hui, da ses secretari LIU Jin e da l'attasché da la partiziun SHENG Shitong. Suenter il barat dals salids uffizials è in gentar cuminaivel stà sin il program.

La regenza grischuna tgira annualmain contacts cun represchentantas e represchentants da stadis esters en Svizra. Quests discurs èn elements impurtants da las relaziuns externas dal chantun. Cun ils stadis vischins e cun pajais che han relaziuns spezialas cun la Svizra e cun il Grischun vegnan savens discutadas dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

Fotografia agiuntada:
-
L'ambassadur GENG Wenbing vegn beneventà en la chasa grischa da la presidenta da la regenza Barbara Janom Steiner.


Gremi: regenza
Funtauna: rg chanzlia chantunala dal Grischun