Zum Seiteninhalt

Emprims resultats dal monitoring dal mustgin-tigher en il Grischun

  • Erste Mitteilung
  • Neuen Beitrag einfügen
L'uffizi chantunal per la natira e l'ambient (UNA) ha fatg l'onn 2016 in monitoring dal mustgin-tigher. Sco quai ch'in nov video da la chanzlia chantunala mussa, èn vegnids cumprovads ovs dal mustgin-tigher en 15 traplas d'ovs en las vischnancas da San Vittore, Roveredo e Grono sco er tar ils pausadis d'autostrada Tusaun e Heidiland.

Il mustgin-tigher è ina spezia da mustgin exotica invasiva. Ultra da la mulesta tras sias morsas dischagreablas stat el en il focus cunzunt sco transmettur potenzial da malsognas infectusas (tropicas). Perquai ch'ils mustgins-tigher exotics prefereschan cundiziuns climaticas miaivlas e viageschan savens sco passagiers clandestins en vehichels, ha l'uffizi per la natira e l'ambient cumenzà cun in monitoring dal mustgin-tigher. Questas retschertgas sa basan sin las activitads correspundentas ch'il chantun Tessin realisescha dapi l'onn 2000. Il monitoring grischun è sa concentrà sin il Mesauc sut e sin ils pausadis d'autostrada per lung da la A13.

Emprims resultats èn ussa avant maun: En 15 da las var 100 traplas d'ovs plazzadas èn vegnids cumprovads ovs dal mustgin-tigher. Ils chats èn dentant stads plitgunsch casuals, e cun paucas excepziuns han ins chattà ovs mo tar ina dad otg rundas d'emprova. Per giuditgar, sch'i existan populaziuns etablidas dal mustgin-tigher en ils territoris da retschertga, èsi impurtant da cuntinuar cun las retschertgas l'onn 2017. Cunzunt las emprovas da la primavaira ston mussar, sch'ina eventuala populaziun da mustgins-tigher ha survivì la stagiun d'enviern. Plinavant èsi previs d'extender il territori da retschertga en il Mesauc sut anc in pau vers nord e da far emprovas orientantas en il Puschlav sut (Brusio), en la Bregaglia sut sco er en la Val dal Rain da Cuira.

Mesiras preventivas da la populaziun
Per la populaziun en ils territoris pertutgads èsi impurtant da savair ch'ils mustgins-tigher mettan lur gnieus en pitschnas accumulaziuns d'aua stagnada. Qua tras resulta er ina emprima e simpla mesira da protecziun: Las abitantas ed ils abitants vegnan supplitgads da sientar regularmain talas pitschnas accumulaziuns d'aua (p.ex. vasas da flurs al liber, sutvaschs, giugarets d'uffants, bigls per utschels, recipients da ruments e.u.v.).

Collavuraziun da las vischnancas
En enclegientscha cun il medi chantunal ha il UNA gia dumandà las vischnancas, sch'ellas coopereschian tar il mantegniment dals lieus da las traplas, tar l'evaluaziun da novs lieus da traplas e tar l'infurmaziun da la populaziun locala. In nov video da la chanzlia chantunala mussa, co che persunas en servetsch civil controlleschan las traplas dals mustgins-tigher, co ch'in laboratori en il Tessin analisescha lura las emprovas e co ch'il UNA instradescha la finala emprimas mesiras.

Fotografia agiuntada:
-

Agiuntas:
Charta
Fegl d'infurmaziun dal mustgin-tigher
Brev d'infurmaziun concernent il monitoring dal mustgin-tigher en il Grischun 2016/2017 dals 6 d'avrigl 2017


Infurmaziuns:
Remo Fehr, manader da l'uffizi per la natira e l'ambient, tel. 081 257 29 41,e-mail Remo.Fehr@anu.gr.ch


Gremi: uffizi per la natira e l'ambient
Funtauna: rg uffizi per la natira e l'ambient
Neuer Artikel

Video