Il cussegl da fundaziun da la fundaziun Stavros S. Niarchos ha examinà er quest onn las dumondas da contribuziun per projects dals secturs cultura, scienza e fatgs socials. Bundant 80 projects vegnan sustegnids cun ina contribuziun finanziala.

La fundaziun ch'è vegnida fundada l'onn 2000 ha l'intent da sustegnair finanzialmain projects culturals, scientifics e socials en il chantun Grischun sco er instituziuns grischunas che s'engaschan sin quests champs. Il cussegl da fundaziun sa cumpona da Philip Niarchos (president), da Spyros Niarchos, d'Alois Jurt, advocat, da Barbara Janom Steiner, presidenta da la regenza dal chantun Grischun, e da Barbara Gabrielli, manadra da l'uffizi da cultura dal Grischun.

Il cussegl da fundaziun sa scuntra mintgamai la primavaira per tractar las dumondas da projects. Er per la sesida da quest onn èn puspè vegnids inoltrads numerus projects interessants ed innovativs da tut las regiuns dal chantun Grischun. Grazia al grond engaschament da la famiglia Niarchos han 82 dals totalmain 175 projects inoltrads pudì vegnir sustegnids cun ina contribuziun finanziala. Quests projects derivan oravant tut dals secturs musica, teater ed istorgia culturala.

La fundaziun Stavros S. Niarchos ha ina valur ordvart gronda per il chantun Grischun. Cun ses agid pon numnadamain vegnir promovids projects multifars en l'entir chantun.


Infurmaziuns:
Barbara Gabrielli, manadra da l'uffizi da cultura dal chantun Grischun, tel. 081 257 48 01, e-mail: Barbara.Gabrielli@afk.gr.ch


Gremi: uffizi da cultura
Funtauna: rg uffizi da cultura