Navigation

Inhaltsbereich

  • Erste Mitteilung
  • Neuen Beitrag einfügen
La regenza ha approvà ina segunda perioda dal program chantunal d'integraziun ed acceptà la construcziun planisada d'in parc d'urs ad Arosa.

Il program chantunal d'integraziun vegn cuntinuà

Dapi il 1. da schaner 2014 reglan la confederaziun ed ils chantuns la promoziun specifica da l'integraziun en il rom da programs chantunals d'integraziun (PCI). Cun l'emprim program chantunal d'integraziun (PCI I) è il Grischun s'obligà da rinforzar sias stentas per l'integraziun da persunas estras en ils trais puncts centrals infurmaziun e cussegliaziun, furmaziun e lavur sco er chapientscha ed integraziun sociala ed ha formulà finamiras correspundentas en chaussa. Quellas cumpiglian emprimas infurmaziuns per persunas novarrivadas, la promoziun linguistica per persunas creschidas e per uffants da la vegliadetgna prescolara fin a la translaziun interculturala u l'integraziun en il martgà da lavur. La perioda dal PCI I dura da l'onn 2014 fin l'onn 2017 e po vegnir valitada gia oz en moda positiva. Ussa ha la regenza approvà in segund program chantunal d'integraziun (PCI II) per ils onns 2018 fin 2021.
Sco gia en il PCI I vegnan preschentadas er en il PCI II mesiras cun la finamira da cuntinuar cun la strategia d'integraziun vertenta. Tar l'elavuraziun da las mesiras per il PCI II èsi vegnì focussà sin la cuntinuaziun da la purschida elavurada en il PCI I, che duai vegnir optimada ed amplifitgada, nua che quai è necessari. Medemamain betg midà han ils puncts centrals fixads da la confederaziun e dals chantuns. Sin fundament da quests puncts centrals e da las experientschas ch'èn vegnidas fatgas fin ussa en il rom dal PCI I vegn mess, er en il PCI II, in cler accent sin la promoziun da las cumpetenzas linguisticas e da l'intermediaziun da lavur.
En il rom da la planisaziun fin l'onn 2021 ha l'uffizi da migraziun e da dretg civil (UMDC) cumpetent previs meds finanzials da 960 000 francs per onn per la promoziun specifica da l'integraziun. Ils custs vegnan surpigliads tenor la legislaziun vertenta per in terz da las vischnancas e per dus terzs dal chantun.

Glisch verda per in territori d'urs ad Arosa
La regenza ha approvà la revisiun parziala da la planisaziun locala d'Arosa, concludida da la vischnanca ils 27 da november 2016. Uschia è vegnida stgaffida la basa per construir in parc d'urs d'ina grondezza da var 29 887 meters quadrat. Cun il parc d'urs vuless la vischnanca d'Arosa stgaffir en il territori "Weber" – en cooperaziun cun l'organisaziun per la protecziun dals animals "Vier Pfoten Schweiz" e cun Arosa turissem – ina installaziun che dat spazi per tegnair set urs en ina moda che resguarda ils basegns da quels.
A medem temp duai il parc d'urs esser accessibel per visitadras e visitaders ed uschia star a disposiziun per infurmar davart il tema urs. Per pudair construir ils edifizis ed ils stabiliments necessaris vegn creada – cun l'adattaziun approvada dals plans d'utilisaziun – la premissa tenor il dretg da planisaziun per la procedura per edifizis e stabiliments ordaifer la zona da construcziun che suonda.

-
© Comet Photoshopping ScRL / Dieter Enz
Visualisaziun parc d'urs 1
Visualisaziun parc d'urs 2


Gremi: regenza
Funtauna: rg chanzlia chantunala dal Grischun
Neuer Artikel