Zum Seiteninhalt

L'uffizi da guaud e privels da la natira ha dà en consultaziun il nov plan per il svilup dal guaud

  • Erste Mitteilung
  • Neuen Beitrag einfügen
Il nov plan per il svilup dal guaud (PSG) 2018+ è vegnì dà en consultaziun. Il PSG furma ina basa actuala moderna cun ina clera norma per l'agir en il guaud grischun. Il PSG è liant per tut las autoritads.

Circa in terz dal chantun Grischun è cuvert cun guaud. Quest guaud protegia vita ed infrastructuras, cuntegna ina gronda diversitad da las spezias ed è lieu da lavur e spazi da recreaziun. Las diversas grondas pretensiuns envers il guaud pon mo vegnir ademplidas, sch'ellas vegnan accordadas ina cun l'autra e sch'eventuals conflicts vegnan percepids a temp. Quai è il senn e l'intent da la planisaziun per il svilup dal guaud.

Il nov PSG è concepì specificamain per las tschintg regiuns forestalas Signuradi/Partenz/Tavau, Val dal Rain/Scanvetg, Surselva, Grischun central/Moesa e Grischun dal sid. Sper princips generals pon uschia er vegnir resguardadas las particularitads da las singulas regiuns. En mintga PSG vegnan tractads ils set temas: guaud da protecziun, explotaziun da laina, natira e cuntrada, guaud da pastgira, recreaziun e turissem, guaud-selvaschina-chatscha ed avertura. En il PSG èn fixadas instrucziuns d'agir surordinadas che permettan da cuntanscher las prestaziuns ecologicas ed economicas giavischadas.

La consultaziun dura fin ils 27 d'october 2017. Las posiziuns pon vegnir tramessas a l'uffizi da guaud e privels da la natira sco suonda:

Online: Tut ils documents necessaris pon vegnir clamads giu da la pagina d'internet www.wep.gr.ch. Ina instrucziun co proceder è agiuntada.

En scrit: Uffizi da guaud e privels da la natira, Loëstrasse 14, 7000 Cuira


Infurmaziuns:
-Reto Hefti, selvicultur chantunal, uffizi da guaud e privels da la natira, tel. 081 257 38 51, e-mail Reto.Hefti@awn.gr.ch
-Riet Gordon, manader dal sectur per l'infurmaziun davart il guaud, uffizi da guaud e privels da la natira, tel. 081 257 38 55, e-mail Riet.Gordon@awn.gr.ch


Gremi: uffizi da guaud e privels da la natira
Funtauna: rg uffizi da guaud e privels da la natira
Neuer Artikel