Zum Seiteninhalt

Project per dapli dunnas en posiziuns da cader

  • Erste Mitteilung
  • Neuen Beitrag einfügen
Las dunnas èn anc adina represchentadas main ferm ch'ils umens en posiziuns da decisiun e da direcziun – er en il Grischun. Il project d'interreg "betrifft: frauen entscheiden" ha la finamira d'encuraschar e da sustegnair mattas e dunnas giuvnas da s'interessar per gremis da decisiun.

Ils umens e las dunnas en ils rapports da las medias

En il rom dad interreg, in program regiunal da l'uniun europeica, han purtadras da project da trais pajais incumbensà l'uniun Amazone dal Vorarlberg da far in uschenumnà tutorial per collavuraturas e collavuraturs da las medias sco er per ulteriuras persunas interessadas per il project "betrifft: Frauen entscheiden". Cun blers cussegls, exempels e links interessants sa fatschentan las utilisadras ed ils utilisaders cun ils temas gender, sexissem en las medias e lingua sensibla a la schlattaina. Ultra da quai survegnan ellas ed els ina invista da la retschertga transcunfinala davart la preschentaziun da las dunnas e dals umens en las medias sco er cifras actualas davart dunnas en posiziuns da direcziun en las regiuns participadas Liechtenstein, Grischun e Vorarlberg. Fin ussa han 145 persunas interessadas fatg diever da quest servetsch online. Il tutorial è accessibel per tuttas e tuts sin medien.frauenentscheiden.org.

Plinavant è vegnida endrizzada ina conferenza-web per collavuraturas e collavuraturs da las medias, en la quala è vegnì discutà sin basa dal tutorial il tema schlattaina en ils rapports da las medias. Bente Knoll – experta per las schlattainas e mainagestiun dal biro per cumpetenza persistenta a Vienna – ha dà vinavant sia expertisa e manà il barat captivant.

Decider politicamain
In ulteriur element dal project d'interreg è in curt curs d'instrucziun che cumpiglia trais moduls. Quel è concepì per dunnas che s'engaschan politicamain en instituziuns, en uniuns, en partidas u en gremis publics u che vulan esser activas en la politica en l'avegnir. Ils moduls ch'èn gia vegnids organisads en il Vorarlberg cuntegnevan basas praticas davart "gender e diversity" ed in'approfundaziun en manaschament da communicaziun e da conflict sco er instruments per la lavur da PR e da medias. L'atun 2017 ha lieu in curt curs d'instrucziun en ina furma sumeglianta a Cuira.

Il project "betrifft: frauen entscheiden" vegn finanzià or da meds finanzials dal fond europeic da svilup regiunal, tras il program d'interreg V Rain Alpin-Lai da Constanza-Rain Aut, tras il post da servetsch per dunnas ed egualitad da l'uffizi da la regenza dal Vorarlberg, tras il post da stab grischun per l'egualitad da las schanzas e tras il sectur spezial per l'egualitad da las schanzas da l'uffizi per servetschs socials dal Liechtenstein.

Ulteriuras infurmaziuns davart il project e las singulas purschidas datti sin: www.frauenentscheiden.org.


Infurmaziuns:
Tamara Gianera, manadra dal post da stab per l'egualitad da las schanzas, tel. 081 257 35 71, e-mail: Tamara.Gianera@stagl.gr.ch


Gremi: post da stab per l'egualitad da las schanzas
Funtauna: rg post da stab per l'egualitad da las schanzas
Neuer Artikel