Stephan Kunz vegn puspè engaschà sco directur dal museum d'art dal Grischun. Nicole Seeberger daventa da nov co-directura.

Ils 21 da zercladur 2017 ha il cusseglier guvernativ Martin Jäger decidì – integrond las persunas participadas externas ed internas – d'analisar danovamain la reorganisaziun da la direcziun dal museum d'art dal Grischun. Quai, suenter ch'el aveva sistì sia emprima decisiun. Cun dr. Hans Hatz è vegnida consultada ina persuna externa che ha survegnì l'incumbensa da sclerir opziuns pussaivlas, da manar discurs individuals cun las persunas participadas e da lura proponer soluziuns pussaivlas. Sin basa da quest process ha pudì vegnir chattada, suenter discurs intensivs, ina soluziun che vegn purtada cuminaivlamain da tut las persunas participadas.

Da nov vegn furmada ina co-direcziun per manar il museum d'art dal Grischun. Stephan Kunz resta vinavant responsabel per la direcziun artistica da la chasa e per la tgira da novas exposiziuns sco er per l'extensiun, la segirada e la tgira da la collecziun. Sco fin ussa è el il liom tar l'uniun grischuna d'art e tar la fundaziun Collecziun grischuna d'art. Dunna dr. Nicole Seeberger surpiglia la direcziun administrativa, persunala e communicativa ed è – en il rom da la collecziun – responsabla per ils secturs economia, documentaziun ed archiv. La directura ed il directur lavuran a partir d'immediat en lur novas posiziuns.

La reorganisaziun concludida dal departament responsabel porta in rinforz considerabel da las funcziuns directivas existentas. Uschia vegn mess il fundament per pudair cuntinuar en moda empermettenta cun il success ch'il museum d'art dal Grischun, avert da nov il zercladur 2016, ha gì enfin ussa.

Agiunta:
organigram
fotografia conferenza da medias 1
fotografia conferenza da medias 2
fotografia conferenza da medias 3
fotografia conferenza da medias 4

Fotografia agiuntada:

Infurmaziuns:
cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail Martin.Jaeger@ekud.gr.ch


Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient