Zum Seiteninhalt

"La chatscha en il Grischun. Nua poss jau retrair la patenta?"

  • Erste Mitteilung
  • Neuen Beitrag einfügen
Gia oz spetgan las chatschadras ed ils chatschaders grischuns cun fevra la proxima stagiun da chatscha che cumenza quest onn ils 2 da settember.

Ellas ed els fan las emprimas preparaziuns. Equipads cun il perspectiv e cun il telescop passentan ellas ed els mintga minuta libra en il territori da chatscha. Passiunadamain vegni "spievlà", observà la selvaschina e sias disas. A chasa vegnan rimnads ils utensils da chatscha, las victualias e las bavrondas per il transport en la chamona da chatscha. Èn vegnidas pajadas las taglias e l'assicuranza da responsabladad obligatorica? Han ellas ed els regulà persunalmain las armas da chatscha? Han ellas ed els absolvì cun success la cumprova obligatorica da la segirezza da culp tenor il standard da la conferenza da las administraturas e dals administraturs da chatscha e da pestga (CCP)? Questa cumprova sto vegnir preschentada per retrair mintga tip da patenta. Èn enconuschentas las novaziuns las pli impurtantas da las prescripziuns da chatscha chantunals? E la finala, per terminar las preparaziuns, cura e nua pon ellas ed els retrair la patenta da chatscha?

Sin la pagina d'internet www.ajf.gr.ch ed en il fegl uffizial dal chantun Grischun dals 10 d'avust 2017 èn publitgads ils lieus, las datas e las uras da la vendita organisada da las patentas. En il museum da la natira dal Grischun pon vegnir cumpradas patentas a partir dals 15 d'avust 2017.

Al spurtegl dal museum da la natira dal Grischun resp. tar ils organs da surveglianza da chatscha èsi anc adina pussaivel da cumprar las patentas da chatscha en daner contant resp. cun cartas da debit. Acceptadas vegnan cartas sco Maestro u Postcard. L'import che sto vegnir pajà vegn tratg giu directamain da Voss conto senza quintar ina cumissiun. Las patentas pon vegnir pajadas cun cartas da credit sco MasterCard u Visa.

Nus giavischain ina buna mira ed ina ritga preda!


Gremi: Uffizi da chatscha e pestga dal Grischun
Funtauna: rg Uffizi da chatscha e pestga dal Grischun
 
Neuer Artikel