Zum Seiteninhalt

Communicaziun da la regenza dals 14 da settember 2017

  • Erste Mitteilung
  • Neuen Beitrag einfügen
La regenza ha repartì ils sezs dal cussegl grond sin ils circuls. Ultra da quai ha ella approvà dus projects da la vischnanca da Tavau cunter privels da la natira.

Elecziuns dal parlament 2018: repartì ils sezs sin ils circuls electorals
En vista a las elecziuns dal cussegl grond dals 10 da zercladur 2018 ha la regenza repartì ils sezs dal cussegl grond sin ils circuls electorals. Decisiva per la repartiziun dals sezs è la populaziun svizra dals circuls electorals sin fundament da la statistica federala da la populaziun e da las chasadas (STATPOP). Per las elecziuns dal cussegl grond 2018 datti midadas dal dumber da sezs en otg circuls electorals. Ils circuls electorals dals Tschintg Vitgs, da la Foppa, da Claustra e da Suot Tasna gudognan mintgamai in sez, ils circuls electorals da la Cadi, da l'Engiadin'ota, da Sur Tasna e da Surses perdan mintgamai in.
Per calcular la repartiziun dals mandats è vegnida consultada la STATPOP 2016 ch'è vegnida publitgada da curt e che cuntegna las cifras dal stadi da la populaziun dals 31 da december 2016. Supplementarmain vegnan resguardads dus cas da fusiuns da vischnancas che chaschunan ina midada da l'appartegnientscha al circul electoral, ma che entran en vigur pir l'onn 2018. D'ina vart sa tracti da l'incorporaziun da la vischnanca da Mut (fin ussa circul electoral d'Alvaschagn) en la vischnanca da Tusaun (circul electoral da Tusaun). Da l'autra vart pertutgi la fusiun da las vischnancas d'Andiast e da Vuorz (fin ussa circul electoral da Rueun) cun la vischnanca da Breil (fin ussa circul electoral da la Cadi). La nova vischnanca da Breil furma ussa il circul electoral da Rueun. La fusiun da las vischnancas d'Andiast, da Vuorz e da Breil sto anc vegnir concludida formalmain dal cussegl grond en la sessiun da december 2017.
La repartiziun dals 120 sezs dal cussegl grond sin ils 39 circuls electorals po vegnir consultada qua. La glista vegn ultra da quai publitgada en il fegl uffizial chantunal.

Dapli segirezza per Tavau grazia a dus projects cunter privels da la natira
La regenza ha approvà dus projects da la vischnanca da Tavau cunter privels da la natira ed ha concedì contribuziuns chantunalas correspundentas. D'ina vart duai vegnir garantida la protecziun da l'abitadi Ardüs e da las vias da traffic vischinas. Da las costas dal territori Breitzug vegnan regularmain a val lavinas che pericliteschan questas infrastructuras. Gia oz vegnan segirads las vias da traffic e l'abitadi cun agid da siglientadas da lavinas. Questas siglientadas che vegnan fatgas cun agid da bittaminas u da helicopters han dentant insaquants dischavantatgs. Pervia da quai vegnan ussa endrizzadas en il territori Breitzug tschintg pitgas per siglientar lavinas. Per quest project ha la regenza approvà ina contribuziun chantunala da maximalmain 615 000 francs.
Da l'autra vart duai vegnir garantida la protecziun da dus edifizis abitads permanentamain en il territori Meierhof. Là vegnan regularmain a val lavinas da naiv glischnanta che pericliteschan ils edifizis. Il territori duai ussa vegnir segirà cun punts da naiv temporaras da totalmain 120 meters sco er cun 45 chavalluts da trais chommas. Il chantun sa participescha cun maximalmain 127 500 francs a quest project.

-
©Uffizi federal da topografia
En il territori da privel Breitzug sa chattan gist plirs laviners (cotschen)

-
©Uffizi da guaud e privels da la natira
Lavinas da naiv glischnanta smanatschan il territori Meierhof

Fixà il sustegn per purschidas da la tgira d'uffants cumplementara a la famiglia
Tut tenor ils basegns individuals stattan a disposiziun per uffants da la vegliadetgna prescolara – sco furmas d'assistenza – canortas, uniuns da geniturs da di sco er geniturs da di privats. Questas structuras d'assistenza vegnan finanziadas tras contribuziuns dals geniturs, tras donaziuns sco er tras las contribuziuns dal chantun e da las vischnancas. La regenza fixescha mintga onn ils custs normads e la tariffa da contribuziun dal chantun per purschidas da la tgira d'uffants cumplementara a la famiglia.
Per l'onn 2018 importan ils custs normads 9,05 francs per ura da tgira e per uffant. La tariffa da contribuziun per novas purschidas importa durant ils emprims 3 onns 25 pertschient dals custs normads. Per tut las ulteriuras purschidas importa la tariffa 20 pertschient. Qua tras resulta l'onn 2018 in sustegn finanzial dal chantun da totalmain 3,5 milliuns francs per la tgira d'uffants cumplementara a la famiglia. Per il preventiv 2018 ha l'uffizi dal servetsch social chantunal fatg quint cun circa 651 plazzas da tgira d'uffants cumplementara a la famiglia.


Gremi: regenza
Funtauna: rg chanzlia chantunala dal Grischun
Neuer Artikel