Zum Seiteninhalt

Promoziun da l'innovaziun en l'agricultura ed en l'economia alimentara

  • Erste Mitteilung
  • Neuen Beitrag einfügen

Il chantun Grischun s'engascha per in'agricultura e per in'economia alimentara grischuna viva, innovativa e valurisanta. A chaschun da la nova messa GUARDA! che metta l'accent sin regiunalitad, aventura ed emoziuns, infurmeschan l'uffizi d'agricultura e da geoinfurmaziun ed il Plantahof davart lur activitads en il sectur da la promoziun da l'innovaziun. Ultra da quai vegn il premi d'innovaziun da quest onn dad alpinavera surdà a la cuminanza da producentas Scarnuz grischun.

Per che l'agricultura e l'economia alimentara grischunas possian sa stgaffir las premissas per producir products da spezialmain auta qualitad e possian entrar en partenadis da lunga durada e persistents, investescha il chantun en la promoziun da products innovativs ed en las lavurs da basa. Uschia po el sustegnair la constituziun da novas branschas da producziun innovativas u per exempel er la commerzialisaziun da products agriculs.

Promover products da chauras
Il center da cumpetenza per muvel manidel al Plantahof ha l'incumbensa da chattar purs che tegnan muvel manidel e da render enconuschents ils products da latg e da charn da chauras e da nursas tar las consumentas ed ils consuments. Ils products da chauras e da nursas che vegnan producids oz a cundiziuns professiunalas, han obtegnì ina buna qualitad ed èn in'alternativa excellenta envers auters products da latg e da charn. Preparond la GUARDA! è vegnì fatg il film "Products da latg-chaura – Ina nischa cun avegnir per il chantun Grischun". Il film vegn mussà per l'emprima giada a la GUARDA! ed infurmescha la publicitad, ed en l'instrucziun da scola è el il punct da partenza per la discussiun davart il tema da tegnair chauras.

Link: film "Products da latg-chaura – Ina nischa cun avegnir per il chantun Grischun"

Istorgias da success per iniziativas regiunalas da commerzialisaziun
Ulteriurs films mussan istorgias da success en la commerzialisaziun da products agriculs regiunals d'auta qualitad. Il film il pli nov da questa retscha preschenta il manaschi Piccoli frutti da Nicolo Paganini en la Val Puschlav. La famiglia Paganini sa concentrescha cun success sin la cultivaziun da pumaraida. En l'elavuraziun han els sviluppà differents novs products sco confituras, sucs per la gastronomia u aschieu. Ils products èn certifitgads sco derivants dal Grischun (ein Stück graubünden e "regio.garantie") e dal territori da muntogna. Las confituras èn er vegnidas recepidas en la lingia Pro Montagna dal Coop.

Link: film "Piccoli Frutti"

Scarnuz grischun survegn il premi d'innovaziun dad alpinavera
Il premi d'innovaziun 2017 dad alpinavera vegn surdà a la cuminanza da producentas Scarnuz grischun. Alpinavera surdat in premi d'innovaziun ad interpresas che commerzialiseschan cun success lur products, che mussan lur concept da commerzialisaziun e che pon sa preschentar a la publicitad cun ina pitschna reclama. L'abilitad da communitgar cun la clientella er sur las medias socialas e sur las medias digitalas, survegn pli e pli impurtanza en il temp dad oz. Las consumentas ed ils consuments na tschertgan betg mo il contact direct, mabain er il contact virtual, per s'infurmar e per decider alura da cumprar.


Infurmaziuns:

- Valentin Luzi, manader da partiziun "mesiras agriculas", UAG, tel. 081 257 24 01, e-mail Valentin.Luzi@alg.gr.ch  
- Stefan Geissmann, cussegliaziun "remagliaders pitschens", Plantahof, tel. 081 257 60 74, e-mail Stefan.Geissmann@plantahof.gr.ch 


Gremi: uffizi d'agricultura e da geoinfurmaziun / Plantahof
Funtauna: rg uffizi d'agricultura e da geoinfurmaziun / Plantahof


Neuer Artikel