Ils trais ambassadurs da la Scandinavia, Thomas Hauff (Norvegia), Timo Rajakangas (Finlanda) e Magnus Hartog-Holm (Svezia) han visità oz – sin invitaziun da la regenza – il chantun Grischun.

Ils ambassadurs èn vegnids beneventads oz en la chasa grischa a Cuira da la presidenta da la regenza Barbara Janom Steiner e dal chancelier Daniel Spadin. Suenter il barat dals salids uffizials è in gentar cuminaivel stà sin il program.

La regenza grischuna tgira annualmain contacts cun represchentantas e represchentants da stadis esters en Svizra. Quests discurs èn elements impurtants da las relaziuns externas dal chantun. Cun ils stadis vischins e cun pajais che han relaziuns spezialas cun la Svizra e cun il Grischun vegnan savens discutadas dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

Fotografia agiuntada:

Da sanestra: L'emprima secretaria da l'ambassada finlandaisa Anitta Talja, l'ambassadur finlandais Timo Rajakangas, l'ambassadur svedais Magnus Hartog-Holm, presidenta da la regenza Barbara Janom Steiner, l'ambassadur norvegiais Thomas Hauff, chancelier Daniel Spadin e la cussegliadra d'ambassada norvegiaisa Bergljot Hovland.


Gremi: regenza
Funtauna: rg chanzlia chantunala dal Grischun