Navigation

Inhaltsbereich

Chatscha grischuna: Cuntanschì la prelevaziun prendida en mira

  • Erste Mitteilung
  • Neuen Beitrag einfügen
A la chatscha grischuna da quest onn èn vegnids sajettads 6500 tschiervs e 4200 chavriels. Uschia èn vegnids ademplids ils plans da prelevaziun dal tschierv en tut las regiuns e dal chavriel en la gronda part da las regiuns. Malgrà la buna preda da la chatscha auta han ins pudì cuntanscher las finamiras vulidas e cunzunt la reducziun dal dumber da tschiervs, grazia a la chatscha speziala, en las differentas regiuns.

Ils 16 da december è vegnida terminada la chatscha speziala 2017 er en las duas ultimas regiuns en la Val dal Rain da Cuira. 1919 chatschadras e chatschaders engaschads èn sa participads dapi ils 11 da november a las chatschas spezialas che han gì lieu en ina regiun suenter l'autra. Là han ellas ed els sajettà circa 1340 tschiervs, 340 chavriels e 4 portgs selvadis. Tut en tut èn vegnids sajettads fin la fin da l'onn – ensemen cun la chatscha auta e cun las prelevaziuns da la surveglianza da chatscha – 6507 tschiervs, 4194 chavriels e 30 portgs selvadis. A cuntanscher quest resultat han gidà – ultra dals gronds dumbers da selvaschina ed ultra da las chatschadras e dals chatschaders motivads – cunzunt er las cundiziuns da chatscha extraordinariamain bunas durant la chatscha auta e durant la chatscha speziala.

Pertutgant il tschierv han ins obtegnì la prelevaziun la pli auta ch'ins ha mai gì e tar il chavriel la segund auta. Uschia èn ils plans da prelevaziun pretensius vegnids ademplids per gronda part ed en differentas regiuns è vegnida iniziada la reducziun vulida da la populaziun da tschiervs.

Cun il cumenzament da l'enviern tempriv ed en las regiuns autas ennavadas cumenza ussa per la selvaschina in temp dir e manglus. Senza las intervenziuns prendidas cun la chatscha auta e cun la chatscha speziala avessan nus ussa cleramain memia blera selvaschina che stuess parter las stgarsas resursas da nutriment. Dumbers da selvaschina regulads bain grazia a la chatscha augmentan per mintga singul animal las schanzas da surviver er in enviern dir, e reduceschan il dumber d'animals disgraziads sin las vias e sin ils binaris.


Infurmaziuns:
dr. Georg Brosi, schef da l'uffizi da chatscha e pestga dal Grischun, tel. 081 257 38 92, e-mail Georg.Brosi@ajf.gr.ch


Gremi: uffizi da chatscha e pestga
Funtauna: rg uffizi da chatscha e pestga
Neuer Artikel