Navigaziun principala

Cuntegn da la pagina

Cumpetitivitad dal turissem grazia ad iniziativas tenor princips d'interpresa

  • Erste Mitteilung
  • Neuen Beitrag einfügen
Il cusseglier guvernativ Jon Domenic Parolini ha beneventà a Tavau persunas da cader dal turissem e da l'economia al 3. dialog turistic a l'ur dal Forum economic mundial (WEF). L'occurrenza è stada sut la devisa "Enavos a la testa! Rinforzar la cumpetitivitad dal turissem svizzer."

Schebain che blers segns pledan actualmain a favur d'ina recreaziun dal turissem, resta l'augment da la cumpetitivitad internaziunala ina sfida centrala per il turissem grischun.

Svizra: dal rang 6 al rang 10
En il pli nov "Travel and Tourism Competitiveness Report 2017" dal WEF ha la Svizra pers quatter plazzas ed occupa ussa mo pli la posiziun 10. Concernent la cumpetitivitad dals pretschs, in da plirs criteris analisads, è la Svizra a l'ultima plazza dals 136 pajais examinads. Cumpetitivitad gudognan particularmain destinaziuns turisticas en la regiun asiatica. Questas ed ulteriuras invistas captivantas da la publicaziun dal WEF pertutgant la cumpetitivitad internaziunala dal turissem ha dà Thierry Geiger, manader da la perscrutaziun dal WEF.

L'economia turistica svizra dovra in engaschament tenor princips d'interpresa
I dovra dapli stentas tenor princips d'interpresa per augmentar la cumpetitivitad dal turissem en Svizra. Da quest avis èn stads las participantas ed ils participants da l'emprim podium. Sut la direcziun da Susanne Giger, anteriura redactura d'economia tar Radio e televisiun svizra SRF, han discutà la secretaria da stadi Marie-Gabrielle Ineichen-Fleisch, Andreas Züllig, president da hotelleriesuisse, Jürg Schmid, president da Grischun vacanzas, sco er Christian Laesser da l'universitad da Son Gagl davart il rapport dal WEF e davart las sfidas da l'industria turistica en Svizra. Malgrà las perditas en la cumparegliaziun internaziunala disponia la Svizra d'in potenzial turistic unic sin in territori fitg pitschen, e quest potenzial duaja vegnir tratg a niz pli fitg.

Pretendì dapli cooperaziun en il turissem grischun
Sut la direcziun dad Ernst A. Brugger, president dal cussegl turistic dal Grischun, han discutà Corinne Denzler, directura da la Tschuggen Hotel-Group, Reto Gurtner, CEO Arena alva SA, e cusseglier guvernativ Jon Domenic Parolini, schef dal departament d'economia publica e fatgs socials, davart las sfidas e las schanzas per il turissem grischun. La funtauna d'inspiraziun per quai è stà il "Cudesch programmatic per il turissem grischun" ch'è vegnì publitgà il november 2017 dal cussegl turistic dal Grischun e che ha chattà dapertut gronda attenziun. Il cusseglier guvernativ Jon Domenic Parolini ha renvià al fatg che l'augment da la cumpetitivitad dal turissem restia ina sfida centrala en il turissem grischun e ch'il svilup positiv en il turissem alpin stoppia vegnir nizzegià per profitar d'ulteriuras sinergias, per lantschar projects innovativs e per promover la cooperaziun tranter las destinaziuns.

Fotografia:
-
Dialog turistic dal WEF: cusseglier guvernativ dr. Jon Domenic Parolini cun Corinne Denzler, Reto Gurtner e prof. dr. Ernst A. Brugger


Infurmaziuns:
- cusseglier guvernativ dr. Jon Domenic Parolini, schef dal departament d'economia publica e fatgs socials, tel. 081 257 23 01, e-mail Jondomenic.Parolini@dvs.gr.ch
- prof. Ernst A. Brugger, president dal cussegl turistic dal Grischun, tel. 044 299 95 95, e-mail Ernst.Brugger@bruggerconsulting.ch


Gremi: departament d'economia publica e fatgs socials
Funtauna: rg departament d'economia publica e fatgs socials
Neuer Artikel