Mesemna, ils 7 da favrer 2018, ha lieu en tut la Svizra il test annual da las sirenas: las 13.30 e 13.45 il "alarm general" e las 14.15 e 14.50 il "alarm dad aua". Cun ils tests da las sirenas vegn d'ina vart controllada la prontezza da funcziun da las sirenas e da l'autra vart po la populaziun emprender d'enconuscher ils differents signals d'alarm, cun ils quals ella vegn alarmada en cas da privel acut.
1. Alarm general
Il "alarm general" vegn dà en tut il chantun, e quai a las 13.30. Quest alarm serva ad
examinar il telecumond da la sirena.
Il "alarm general" è in tun urlant che va si e giu e che dura ina minuta. I na ston vegnir
prendidas naginas mesiras da cumportament e da protecziun.
Sch'il signal "alarm general" resuna però ordaifer la controlla da las sirenas annunziada, vul
quai dir ch'ina periclitaziun da la populaziun saja pussaivla. En quest cas duai la populaziun
tadlar radio, suandar ils avis da las autoritads ed infurmar las vischinas ed ils vischins.
2. Alarm dad aua
Il "alarm dad aua" vegn dà cun las sirenas da l'alarm dad aua a las 14.15 e 14.50. I sa
tracta d'in tun bass interrut regularmain che dura sis minutas. I na ston vegnir prendidas
naginas mesiras da cumportament e da protecziun. L'alarm dad aua resuna mo en
l'intschess da mirs da fermada. Dals plans da fugia en cas d'alarm dad aua pon ins prender
invista tar questas vischnancas.
Sch'il signal "alarm dad aua" resuna però ordaifer la controlla da las sirenas annunziada,
vul quai dir ch'ina periclitaziun da la populaziun saja pussaivla. En quest cas duai la
populaziun bandunar immediatamain il territori periclità.
Ulteriuras infurmaziuns e reglas da cumportament sa chattan ins sin il Teletext, pagina 680/681,
e sil internet
www.sirenentest.ch
La populaziun vegn supplitgada d'avair chapientscha per las dischagreabladads en connex cun
las controllas da sirenas.
Infurmaziuns:
Bruno Casutt, substitut parsura dall'Uffizi da militar e da protecziun civila, Tel. 081 257 35 26, E-Mail
Bruno.Casutt@amz.gr.ch
Gremi: uffizi da militar e da protecziun civila
Funtauna: rg uffizi da militar e da protecziun civila