Navigation

Inhaltsbereich

Nov plan per il svilup dal guaud per il Grischun

  • Erste Mitteilung
  • Neuen Beitrag einfügen
L'uffizi chantunal da guaud e privels da la natira (UGP) ha elavurà il nov "Plan per il svilup dal guaud 2018+". Per il svilup dal guaud grischun dovri ina planisaziun lianta. Il plan per il svilup dal guaud (PSG) è perquai in instrument impurtant per ils possessurs da guaud e per il chantun.

Cun il PSG duai il svilup dal guaud grischun vegnir planisà ils proxims onns en moda lianta per las autoritads. Il PSG è in instrument directiv impurtant per l'entira administraziun chantunala, ma er per ils possessurs da guaud e per ils reviers forestals. En il PSG èsi fixà tge che duai vegnir cuntanschì e tge che sto vegnir fatg per quai. Il PSG è dividì en ils set temas (uschenumnads fegls d'object): "guaud da protecziun", "explotaziun da laina", "natira e cuntrada", "guaud da pastgira", "recreaziun e turissem", "guaud-selvaschina-chatscha" ed "avertura".

La tgira dal guaud sco incumbensa communabla
Il guaud en il Grischun ademplescha quatter incumbensas impurtantas: El ans protegia en moda favuraivla cunter privels da la natira, el è il spazi da recreaziun il pli grond per indigens e per turists, el furnescha il lain sco materia prima regenerabla ed el porscha spazi da viver per 40 pertschient da tut las spezias d'animals e da plantas ch'i dat en Svizra. Perquai èsi impurtant a lunga vista da mantegnair il guaud. La tgira dal guaud è ina incumbensa communabla tranter ils possessurs, il chantun e la confederaziun. Il planisar è ina moda da pensar prospectiva, e gist en il guaud cun sia creschientscha fitg plauna è in tal pensar d'ina impurtanza enorma. Cun il PSG han ins ussa en maun in instrument che determinescha tge che po vegnir spetgà dal guaud e tge che sto vegnir fatg per ademplir questas aspectativas. Il PSG coordinescha ils differents giavischs e gida a schliar conflicts che naschan, e quai cun inditgar il spazi d'agir ed ils cunfins dals partenaris involvids.

L'incumbensa la pli impurtanta dal guaud: protecziun cunter privels da la natira
Il "Plan per il svilup dal guaud 2018+" è vegnì sviluppà vinavant or da l'emprima generaziun da plans da quest gener ch'èn vegnids creads gia ils onns 1990. Da quel temp èn quai stads 18 differents documents, oz èn quai tschintg, adattads a las tschintg regiuns forestalas chantunalas. La revisiun è stada necessaria, perquai che l'emprima versiun dal PSG è gia stada passa 20 onns veglia. La versiun vertenta è vegnida adattada a las novas cundiziuns generalas e regularitads. Ussa vali da l'actualisar e da l'adattar permanentamain a las novas relaziuns. L'incumbensa la pli impurtanta dal guaud grischun è la protecziun cunter privels da la natira. Pervia da quai ha il guaud da protecziun, che cumpiglia circa 61 pertschient da la surfatscha da guaud dal Grischun, ina gronda impurtanza entaifer il PSG. Cun il PSG duai vegnir promovì il guaud per che quest multitalent possia ademplir sia funcziun a lunga vista. La finamira prioritara è quella da garantir ch'il guaud sa regiuvineschia.

Vasta consultaziun
Il nov PSG è vegnì elavurà cun agid da differents posts. En la segunda mesadad da l'onn 2017 hai dà ina vasta consultaziun, en il rom da la quala èn vegnids inoltrads numerus resuns. Tut ils giavischs èn vegnids examinads, respundids e – nua che quai è stà pussaivel e raschunaivel – integrads en il PSG. Tar la versiun dal PSG preschentada da nov sa tracti da la versiun d'exposiziun surlavurada ed adattada che dovra anc il consentiment da las vischnancas, avant che la regenza grischuna la po metter definitivamain en vigur.


Infurmaziuns:

Per dumondas generalas concernent la conferenza da medias e pertutgant il PSG:
  • president da la regenza dr. Mario Cavigelli, schef dal departament da construcziun, traffic e selvicultura dal Grischun, tel. 081 257 36 01, e-mail Mario.Cavigelli@bvfd.gr.ch
  • Reto Hefti, selvicultur chantunal, uffizi da guaud e privels da la natira, tel. 081 257 38 51, e-mail Reto.Hefti@awn.gr.ch
  • dr. Riet Gordon, manader dal sectur planisaziun dal guaud e reviers forestals, tel. 081 257 38 55, e-mail Riet.Gordon@awn.gr.ch

Per dumondas davart la realisaziun concreta dal PSG en las regiuns:
  • regiun 1, Signuradi / Partenz / Tavau: manader da la regiun, Matthias Zubler, uffizi da guaud e privels da la natira, tel. 081 257 66 40, e-mail Matthias.Zubler@awn.gr.ch
  • regiun 2, Val dal Rain / Scanvetg: manader da la regiun, Magnus Rageth, uffizi da guaud e privels da la natira, tel. 081 257 61 85, e-mail Magnus.Rageth@awn.gr.ch
  • regiun 3, Surselva: manader da la regiun, Urban Maissen, uffizi da guaud e privels da la natira, tel. 081 257 62 80, e-mail Urban.Maissen@awn.gr.ch
  • regiun 4, Grischun central / Moesano: manader da la regiun, Lukas Kobler, uffizi da guaud e privels da la natira, tel. 081 257 50 21, e-mail Lukas.Kobler@awn.gr.ch
  • regiun 5, Grischun dal sid: manader da la regiun, Gian Cla Feuerstein, uffizi da guaud e privels da la natira, tel. 081 851 20 80, e-mail Gian.Cla.Feuerstein@awn.gr.ch

Fotografias en qualitad da stampa ed ils plans da las singulas regiuns sco datoteca PDF chattais Vus sin la pagina d'internet dal uffizi da guaud e privels da la natira.


Gremi: departament da construcziun, traffic e selvicultura
Funtauna: rg departament da construcziun, traffic e selvicultura
Neuer Artikel