Navigation

Inhaltsbereich

Communicaziun da la regenza dals 8 da mars 2018

  • Erste Mitteilung
  • Neuen Beitrag einfügen
La regenza ha approvà in project per proteger la Viafier retica a Maladers. Plinavant ha ella dà glisch verda ad in project per la correcziun da las auas a Schiers.

Project per proteger la Viafier retica a Maladers
La regenza ha approvà il project "Protecziun cunter crudada da crappa Sassal – Untersax" da la Viafier retica. La Viafier retica ha laschà elavurar l'onn 2013 ina charta d'infurmaziun davart las ristgas per sia entira rait. En quest connex èsi vegnì constatà ch'il traject Sassal – Untersax a Maladers è periclità sin ina lunghezza da circa 1,5 kilometers dad eveniments da crudada da crappa e da blocca. Per incumbensa da la Viafier retica ha l'uffizi da guaud e privels da la natira lura examinà mesiras tecnicas per reducir la situaziun da privel ed elavurà in project correspundent.
Quest project ha la finamira da garantir la protecziun da la viafier. Per quest intent vegn segirà il territori cun stender raits sur circa 1700 meters quadrat e cun montar raits cunter crudada da crappa d'ina lunghezza da 425 meters. Las lavurs vegnan exequidas en tschintg etappas e duain vegnir terminadas l'onn 2022. Tut en tut custa il project circa 3,4 milliuns francs.

-

Megliers rempars per il Schraubach a Schiers
La regenza ha approvà in project da la vischnanca da Schiers per meglierar ils rempars dal Schraubach. Il Schraubach rimna las auas da las costas sid da la chadaina da muntognas Girenspitz – Kirchlispitzen – Drusenfluh (Dri Türm) – Chüenihorn e sbucca en la Landquart. Pervia dal terren ch'è suttapost a la dischagregaziun n'han las costas da las vals mai paus. Perquai valeva il Schraubach durant lungs temps sco in dals torrents ils pli privlus dal Partenz. Gia l'onn 1910 han ins cumenzà a construir rempars sistematics sin ils trajects periclitads. Dapi quella giada è il sistem da rempars vegnì amplifitgà e renovà periodicamain.
A chaschun da l'inspecziun generala èsi dentant vegnì constatà che quatter rempars da torrent (a Fadiel sur la sbuccada en l'aual da Salgina) èn donnegiads e per part lavads orasut. Per pudair garantir la protecziun cunter aua gronda er en il futur, ston vegnir eliminads ils donns vi da quests rempars. Als custs da 300 000 francs per il project sa participeschan la confederaziun ed il chantun tenor la cunvegna da program "Ovras da protecziun cunter l'aua".

-

Augment dals pais maximals permess sin quatter vias chantunalas
Suenter che la construcziun e la renovaziun da quatter vias chantunalas da colliaziun èn terminadas, ha la regenza approvà l'augment dals pais maximals permess. D'ina vart dastgan ins charrar da nov cun vehichels da 32 tonnas sin la via da Siat, access a la via sursilvana – Siat, e sin la via d'Andiast, access a la via sursilvana – Andiast, en il district Glion. Il medem vala per la via d'Alvaschagn, interpresa da construcziun en lain Projer – fin da la via chantunala, en il district Tusaun. Da l'autra vart vegn augmentà il pais maximal permess a 28 tonnas sin la via da Rossa, access a la via da Calanca – basa da l'uffizi da construcziun bassa, en il district Mesauc. Questas mesiras entran en vigur, uschespert che la signalisaziun è adattada.

-
Via da Siat, access a la via sursilvana – Siat

-
Via d'Andiast, access a la via sursilvana – Andiast
©Uffizi federal da topografia


Gremi: regenza
Funtauna: rg chanzlia chantunala dal Grischun
Neuer Artikel