Navigation

Inhaltsbereich

Communicaziun da la regenza dals 22 da mars 2018

  • Erste Mitteilung
  • Neuen Beitrag einfügen
La regenza ha prendì posiziun tar la petiziun "Moesano pulito" sco er tar la consultaziun da la confederaziun concernent contribuziuns als gieus olimpics e paralimpics d'enviern "Sion 2026". Ultra da quai ha ella garantì a la fundaziun Center da persunas attempadas dal Signuradi ina contribuziun chantunala per manar in ospizi.

Posiziun da la regenza tar la petiziun "Moesano pulito"
La regenza ha respundì la petiziun "Moesano pulito" concernent firmas da chaschas da brevs en la regiun Moesa. Ils petiziunaris pretendan che las autoritads chantunalas fetschian retschertgas cumplessivas e conscienziusas. Uschia duai vegnir eruì, sche firmas fictivas u firmas da chaschas da brevs en il Moesano han commess eventuals acts penalmain relevants.
La regenza observa attentamain il svilup concernent firmas da chaschas da brevs en la regiun Moesa e prenda serius la situaziun. Ella renconuscha e chapescha che las vischnancas, la politica e la populaziun en il Mesauc èn preoccupadas pervia da l'augment dal dumber da firmas da chaschas da brevs. La regenza na tolerescha nagins abus. Correspundentamain vegni controllà, sch'i dat irregularitads tar tschertas firmas. Las autoritads chantunalas nizzegian las pussaivladads che stattan en lur cumpetenza e prendan gia dapi l'onn 2016 mesiras per impedir abus en connex cun la fundaziun da firmas da chaschas da brevs. Uschia è per exempel vegnida intensivada e coordinada pli fitg la collavuraziun tranter ils posts chantunals pertutgads, numnadamain il register da commerzi, l'uffizi per industria, mastergn e lavur, l'uffizi da migraziun e da dretg civil sco er la polizia chantunala. Firmas en il Mesauc che vulan sa laschar inscriver en il register da commerzi, vegnan observadas rigurusamain. La polizia chantunala fa gia dapi in temp pli lung scleriments preliminars. En cas d'in suspect d'irregularitads u d'in cumportament criminal vegnan prendidas las mesiras correspundentas ed introducidas proceduras penalas. L'uffizi per industria, mastergn e lavur controllescha, sche las firmas che occupan lavurantas e lavurants observan las disposiziuns davart las lavurantas ed ils lavurants tramess. En cas che permissiuns da dimora vegnan obtegnidas en quest connex tras fraud, po l'uffizi da migraziun e da dretg civil examinar ina retratga da questas permissiuns.
La libertad d'agir dal chantun è dentant limitada, en spezial pervia dal dretg federal surordinà. Ina firma da chascha da brevs è da princip legala. Il dretg federal regla las premissas per la fundaziun respectivamain per l'inscripziun en il register da commerzi. Il chantun sto sa mover entaifer quest rom. Il chantun è er dependent da la cooperaziun da las vischnancas. Il schaner 2018 èn perquai dus represchentants da la regenza, collavuraturs da las autoritads chantunalas cumpetentas sco er represchentants da las vischnancas e da la regiun Moesa sa cussegliads detagliadamain davart la situaziun ed han discutà ils problems sco er las mesiras pussaivlas. Sco resultat han las vischnancas da la regiun Moesa ed il chantun Grischun concludì da far ulteriuras sforzs, da rinforzar las mesiras, la collavuraziun e la coordinaziun sco er d'unir lur forzas per far frunt en moda unida a la fundaziun abusiva da firmas da chaschas da brevs en la regiun Moesa. En quest senn vegn acceptada la petiziun.

"Sion 2026" – Il Grischun sustegna mo San  urezzan sco lieu d'occurrenza

La regenza ha prendì posiziun tar la consultaziun dal departament federal da defensiun, protecziun da la populaziun e sport (DDPS) davart contribuziuns da la confederaziun als gieus olimpics e paralimpics d'enviern "Sion 2026". Cun quatter conclus da credit duain vegnir fixadas las contribuziuns da la confederaziun ad eventuals gieus olimpics e paralimpics d'enviern 2026 en Svizra. Ils conclus da credit concernan la candidatura sco er eventualmain la realisaziun dal project "Sion 2026".
Da princip ha la regenza ina tenuta positiva envers gieus olimpics d'enviern en Svizra ch'èn decentrals ed adattads a las relaziuns localas. Pervia dals dus votums negativs dal pievel "GR 2022" e "GR 2026" sto ella però demussar ina posiziun reservada. Cun San Murezzan sco lieu per las concurrenzas da bob, da scarsola e da skeleton è il Grischun ina part integrala da la candidatura "Sion 2026". Perquai è la regenza però pronta da garantir quella contribuziun chantunala ch'i dovra per deliberar la contribuziun federala CISIN per che las investiziuns necessarias per renovar la pista da bob San Murezzan-Schlarigna possian vegnir fatgas.
Il chantun Grischun na sa quinta però explicitamain betg tar ils uschenumnads chantuns da realisaziun. Quai signifitga ch'il engaschament dal chantun Grischun sa restrenscha ad in eventual sustegn finanzial dal lieu da concurrenza en il Grischun. Il focus sa chatta en quest connex mo sin il metter a disposiziun in lieu da concurrenza adattà per ils gieus olimpics e da garantir la segirezza correspundenta a San Murezzan sco lieu da concurrenza. Il chantun na paja naginas contribuziuns als custs da la candidatura. El na surpiglia er naginas garanzias da deficit per deficits en il preventiv da realisaziun che n'èn betg cuvrids da la contribuziun da deficit da la confederaziun.

Consultaziun dal departament federal da defensiun, protecziun da la populaziun e sport

Contribuziun chantunala per manar e per confinanziar in ospizi en il Grischun
La regenza ha garantì a la fundaziun Center da persunas attempadas dal Signuradi a Maiavilla ina contribuziun chantunala annuala da maximalmain 400 000 francs per ils onns 2019 fin 2021 per manar e per confinanziar in ospizi en il Grischun. La contribuziun vegn concedida sut la resalva ch'il cussegl grond dettia la permissiun da manaschi sco er approveschia il credit per l'ospizi.
L'idea per manar in ospizi en il chantun Grischun è vegnida tematisada ils ultims onns da differentas persunas ed organisaziuns. Correspundentamain èn vegnidas fatgas diversas activitads e scleriments per stgaffir ina tala purschida. L'uffizi da sanadad ha installà perquai l'avust 2016 ina gruppa da project che aveva la finamira d'elavurar la basa per la gestiun d'in ospizi en il Grischun. Suenter scleriments cumplessivs è la gruppa da project arrivada a la conclusiun ch'il basegn per in ospizi saja cumprovà e ch'ina eventuala iniziativa per fundar in ospizi stuess vegnir sustegnida.
Sco proxim pass sto la fundaziun Center da persunas attempadas dal Signuradi inoltrar ina dumonda correspundenta tar l'uffizi da sanadad per survegnir ina permissiun da manaschi. L'ospizi duai dar ad umans en l'ultima fasa da vita la pussaivladad da pudair murir cun dignitad. Admess vegnan umans ch'èn pli vegls che 18 onns e che n'èn anc betg entrads en ina instituziun da persunas attempadas e da tgira. Ina dimora en l'ospizi po er esser transitorica en il senn d'ina distgargia per las persunas che tgiran lur confamigliars e per las persunas da referiment. Er ina dimora durant il di u durant la notg po porscher ina distgargia. L'accumpagnament e la cussegliaziun dals confamigliars e da las persunas da referiment sco er l'accumpagnament da led e da malencurada èn incumbensas essenzialas ch'in ospizi ademplescha.

La senda sin la via da Meiersboden a Cuira duai vegnir optimada
La regenza ha approvà in project da construcziun per optimar il traffic betg motorisà sin la via da Meiersboden. Questa approvaziun è vegnida concedida cun resalva da la procedura per la permissiun da construcziun da la citad da Cuira. Plinavant ha ella deliberà ina contribuziun chantunala da maximalmain 601 200 francs.
Sin la via da Meiersboden, en il sectur via dal Sand / via da Sassal sa chatta la senda da muntogna Cuira - Passugg che fa part da sia vart da la ruta regiunala da viandar appreziada da la via da son Giachen. Il traffic da peduns vegn oz manà per part er sin il vial da la via da Meiersboden. L'avertura existenta cun la senda è da qualifitgar sco suffizienta or dal puntg da vista puramain giuridic. Tuttina pari dad esser raschunaivel d'optimar la situaziun e da meglierar la segirezza per las pedunas ed ils peduns. Pervia da quai vegn amplifitgada la via e senda da viandar per lung da la via dal Sand e da la via da Sassal ed i vegnan construidas ina punt da metal vi dal mir da sustegn sco er ina senda cun gera.

- -


Gremi: regenza
Funtauna: rg chanzlia chantunala dal Grischun
Neuer Artikel