Navigation

Inhaltsbereich

  • Erste Mitteilung
  • Neuen Beitrag einfügen
Quatter da diesch studentas e students dals secturs matematica, informatica, scienzas natiralas e tecnica bandunan il chantun Grischun suenter ch'els han terminà lur studi – quai mussa in studi da l'uffizi federal da statistica. Cun l'occurrenza da "trampolin" vul l'uffizi per economia e turissem cumbatter cunter questa tendenza.

L'occurrenza da "trampolin" ha lieu ils 16 d'avrigl 2018 en l'auditori da la banca chantunala grischuna a Cuira. Gia per la 12. giada s'inscuntran studentas e students da differentas scolas autas e patrunas e patruns dal chantun Grischun. L'uffizi per economia e turissem, l'uffizi per la furmaziun media-superiura, la SATE Cuira e la Graduate School dal Grischun èn ils incumbensaders da l'occurrenza da "trampolin".

Enconuscher las sfidas e stabilir contacts
En il center da l'occurrenza da "trampolin" stat la lavur cuminaivla en lavuratoris che vegnan realisads directamain tar las interpresas. En quest connex preschentan interpresas regiunalas a las studentas ed als students ina sfida actuala da lur differents champs da lavur. En in segund pass vegnan elavuradas cuminaivlamain propostas da soluziun innovativas. Las studentas ed ils students pon uschia dar in sguard unic davos las culissas da las interpresas. Pli tard, durant l'apero da talent cuminaivel, pon las interpresas mussar en in'atmosfera lucca lur perspectivas da carriera per las studentas ed ils students e stabilir contacts persunals e duraivels cun lavurantas e lavurants pussaivels.

Niz per tuttas duas varts
A las interprendidras ed als interprendiders grischuns porscha l'occurrenza da "trampolin" GR la pussaivladad d'emprender d'enconuscher blers talents. Quest onn sa participeschan las suandantas interpresas a l'occurrenza: CSEM Nanomedicine Division, EMS-CHEMIE SA, Graduate School dal Grischun, Banca chantunala grischuna, Hamilton Bonaduz SA, Landqart SA, Swiss Life Select Svizra SA, Interpresa TRUMPF Grüsch e VZ VermögensZentrum SA.

Ins po anc s'annunziar
L'occurrenza da "trampolin" en il Grischun è ina da totalmain otg occurrenzas da "trampolin" en Svizra ed ha lieu glindesdi, ils 16 d'avrigl 2018. Studentas interessadas e students interessads pon anc s'annunziar per "l'event da trampolin" sut www.sprungbrett-event.ch.

Program
13:15 – 17:00: inspecziun da l'interpresa/lavuratori tar l'interpresa
17:00 – 17:30: transfer individual a l'auditori da la BCG a Cuira
17:30 – 19:00: apero da talent


-
Apero da talent da l'occurrenza da "trampolin" dal Grischun 2017
©together SA


Infurmaziun per collavuraturas e collavuraturs da las medias:
Las collavuraturas ed ils collavuraturs da las medias èn envidads d'accumpagnar l'occurrenza cun lur media. L'uffizi per economia e turissem sustegna gugent l'organisaziun al lieu.

Infurmaziuns:
Paolo Giorgetta, svilup da l'industria locala, uffizi per economia e turissem, tel. 081 257 23 75, e-mail Paolo.Giorgetta@awt.gr.ch


Gremi: uffizi per economia e turissem
Funtauna: rg uffizi per economia e turissem
Neuer Artikel